Qostanaıdaǵy «Iýbıleınyı» shaǵyn aýdanynda 280 oryndyq jańa balabaqsha paıdalanýǵa berildi. Bul – keıingi on shaqty jyl ishinde eńse tiktegen jańa shaǵyn aýdanda salynǵan alǵashqy balabaqsha.
Qalanyń soltústik shetinde ornalasqan aýdanda negizinen jas otbasylar turyp jatyr. Jańa bóbekjaı buǵan deıin jaqyn mańaıda balabaqsha bolmaǵandyqtan, tań atpaı balalaryn qalanyń ortalyǵyna, ekinshi bir shetine tasyp ábiger bolyp kelgen jumysbasty ata-analardyń qolyn uzartyp otyr.
«Balabaqshanyń ashylýyn taǵatsyzdana kúttik. Úıge jaqyn, balaǵa da, bizge de óte yńǵaıly. Eń bastysy, el – aman, jurt – tynysh. Memleketimiz ata-analarǵa, balalarǵa barynsha qamqorlyq kórsetip jatyr. Ony kórip-bilip, sezinip otyrmyz. Osydan biraz jyl buryn úısiz edik, úı berdi, odan keıin úıdiń janynan mektep salyp berdi. Endi, mine, búgin balamyzdy balabaqshaǵa alyp keldik», deıdi «Iýbıleınyı» shaǵyn aýdanynyń turǵyny Raýshan Imanqulova.
Balabaqshanyń qurylysyna 1,7 mıllıard teńge qarjy jumsalǵan. Munda 2 jastan 5 jasqa deıingi balalarǵa arnalǵan qazaq, orys tildi 15 top jumys isteıdi. Úsh qabatty, eki qanatty zamanaýı balabaqsha qazirgi talapqa saı, qajet dúnıeniń bárimen jabdyqtalǵan. Balalardyń jan-jaqty damýyna qaýipsiz ári jaıly jaǵdaı jasalǵan. Jatyn bólmeleri jaıly, oıyn bólmeleri keń. Horeografııa, gımnastıka, mýzyka, sport zaldary bar. Pedagog-psıholog, logoped mamandar jumys isteıtin arnaıy bólmeler, qosymsha bilim berý kabınetteri, dárigerlik em-shara júrgizetin jeke kabınet qarastyrylǵan.
Balabaqshanyń ashylý rásimine arnaıy kelgen oblys ákimi Qumar Aqsaqalov shaǵyn aýdan turǵyndaryn quttyqtap, balabaqshany aralap shyqty.
«Oblystyń áleýmettik saıasatynyń basty mindetteriniń biri – mektepke deıingi bilim berýdiń sapasyn arttyrý. Erte jastan bastap mektep jasyna deıingi balalardyń IT-quzyretterin qalyptastyrý úshin munda ınnovasııalyq STEAM-zerthanasy bar «sıfrlyq balabaqsha» júıesi engiziletin bolady. Balalar robototehnıkamen aınalysady, eksperımentter men tájirıbeler jasaı alady. Anımasııa stýdııasynda óz qııalymen mýltfılm jasaıdy, sondaı-aq kvadrokopter júrgize alady. «Iýbıleınyı» shaǵyn aýdanynda ashylǵan jańa nysan oblys ortalyǵyndaǵy balabaqsha kezegin 18%-ǵa tómendetýge múmkindik beredi. Munda 43 tárbıeshi, tárbıeden tys mindetterdi atqaratyn 34 adam jumys isteıdi», dedi ákim.
Búginde óńirde balaǵa mektepke deıingi bilim beretin 485 mekeme bar. Oblys kóleminde balabaqshaǵa baratyn balalardyń sany shamamen 32 myńnan asady. Al Qostanaı qalasyndaǵy 74 balabaqshaǵa 11 myńnan asa bala baryp júr.
Bıyldyń ózinde Rýdnyı, Arqalyq qalalarynda, Qostanaı, Áýlıekól, Jangeldın aýdandarynda jańa balabaqshalar ashyldy. Bul bóbekjaılar búginde 760 balaǵa mektepke deıingi bilim berip jatyr.
Qostanaı oblysy