Abaı oblysynda elimizdi Qytaımen baılanystyratyn jolaýshylar termınaly ashyldy. Memlekettik shekaranyń Qazaqstan-Qytaı ýchaskesinde iske qosylǵan termınal halyqaralyq baılanystardy nyǵaıtýǵa jol ashady. Termınal «Baqty» keden beketin jańǵyrtý, tehnıkalyq jaraqtandyrý aıaqtalǵanǵa deıin jumys isteıdi.
Bul beket týrısterge qoldanystaǵy zańnamaǵa sáıkes belgilengen tártippen eki el arasyndaǵy shekaradan erkin ótýge múmkindik beredi. Buǵan deıin termınaldar tek júk kóligin ótkizý maqsatynda jumys istedi. Jańa termınaldy iske qosýdyń artyqshylyǵy – el azamattary kórshiles memleketke ótip, belgilengen ýaqyt ishinde barǵan-kelgen sharýasyn tyndyryp shyǵa alady. Buǵan qosa arnaıy ruqsaty bar avtokólikpen kirý máselesi de qarastyrylǵan.
Termınal barlyq jolaýshylarǵa memlekettik shekaradan yńǵaıly, qaýipsiz ótýdi qamtamasyz etedi. Bul shara kedendik baqylaý úderisin jedeldetip, kútý ýaqytyn qysqartýǵa múmkindik beredi deıdi arnaıy sala mamandary.
«Termınaldy iske qosý Memlekettik kirister Komıtetiniń QHR ókilderimen úılesimdi jumysynyń, yntymaqtastyǵynyń arqasynda júzege asyp otyr. Bul rette QHR-dan jeke paıdalaný úshin ákelinetin júktiń salmaǵy «Jeke paıdalanýǵa arnalǵan taýarlar men jekelegen máseleler týraly» Eýrazııalyq ekonomıkalyq komıssııa Keńesiniń 2017 jylǵy 20 jeltoqsandaǵy №107 sheshimine sáıkes aıyna 25 kılogramnan aspaýy tıis. Termınaldy iske qosqannan beri elimizge 180 adam kelse, Qytaıǵa 214 tulǵa ótti», deıdi Abaı oblysy boıynsha Memlekettik kirister departamentiniń túsindirý jumysy jáne baılanys ortalyǵy basqarmasynyń basshysy Ásem Turlybekova.
Keler jyldyń Qazaqstandaǵy Qytaı týrızmi jyly bolyp jarııalanǵanyn eskersek, termınal týrızmdi damytýǵa, Qazaqstan-Qytaı arasyndaǵy dostyq qarym-qatynasty nyǵaıtýǵa da mol múmkindik beredi.
Abaı oblysy,
Maqanshy aýdany