Senator Talǵat Júnisov Kókshetaý qalasyna barǵan saparynda oblys ákimi jáne máslıhat tóraǵasymen kezdesip, qalany damytý, sondaı-aq qalalyq ınfraqurylym men áleýmettik salany jaqsartý máselelerin talqylady, dep jazady Egemen.kz.
Senator Amangeldi Nuǵmanov Aqtóbe oblysynyń ákimimen jáne óńirdiń aktıvimen kezdesti. Kezdesý barysynda ákim senatorǵa 2024 jyldyń áleýmettik-ekonomıkalyq qorytyndylary, aǵymdaǵy jumystar men ózekti máseleler týraly baıandady. Ásirese avtomobıl joldarynyń jaǵdaıy, ekologııalyq ahýal, áleýmettik qyzmetterdiń sapasy, ınfraqurylym jáne ınternetke qoljetimdilik máseleleri qozǵaldy.
«Prezıdent halyqtyń shynaıy muqtajyna nazar aýdarý kerektigin aıtyp otyr. Aýyldyq aımaqtardy nyǵaıtý, áleýmettik jáne kólik ınfraqurylymyn damytý, agrarlyq sektor men jańa tehnologııany qoldaý – bul bárimiz birlesip sheshýge tıisti mindetter», dedi senator.
Senat depýtattary Álı Bektaev, Murat Qadyrbek jáne Alısher Satvaldıev Túrkistan oblysy Maqtaaral aýdanynda júzege asyp jatqan áleýmettik jáne ınfraqurylymdyq jobalardyń barysymen tanysty.
Prezıdenttiń «Ádiletti memleket. Birtutas ult. Berekeli qoǵam» atty Joldaýynda bastaý alǵan «Jaıly mektep» ulttyq jobasy aıasynda osy aýdanda jańa bes mekteptiń qurylysy josparlanǵany týraly depýtattar habardar boldy. Senatorlar Atakent aýylynda salynyp jatqan mektep qurylys alańyn aralady. 1500 orynǵa arnalǵan bul mektep zamanaýı qural-jabdyqtarmen, onyń ishinde robototehnıka kabınetterimen, keń jolaqty ınternetpen jáne zerthanalarmen jabdyqtalady. Bul bilim sapasyn arttyrýǵa jáne muǵalimderdiń biliktiligin kóterýge múmkindik beredi.
Depýtat Ernur Áıtkenov Pavlodar oblysyndaǵy Maı aýdandyq máslıhatynyń depýtattarymen óńirdiń áleýmettik-ekonomıkalyq damýynyń negizgi máselelerin talqylady. Prezıdent Qasym-Jomart Toqaevtyń «Ana tili» gazetinde jarııalanǵan suhbaty talqylaýdyń basty taqyrybynyń biri boldy. Onda Memleket basshysy ınfraqurylym, turǵyn úı qurylysy jáne ekonomıkanyń negizgi salalaryn damytýdaǵy 2024 jylǵy jetistikterdi atap ótken bolatyn.
Ernur Áıtkenov kommýnaldyq ınfraqurylymdy jańartýdy jalǵastyrý, joldar men turǵyn úıler salý qajettigin, sondaı-aq aýyl sharýashylyǵyn qoldaýdyń mańyzdylyǵyna nazar aýdardy.
Senattyń Áleýmettik-mádenı damý jáne ǵylym komıtetiniń tóraǵasy Nurtóre Júsip A.Baıtursynov atyndaǵy Til bilimi ǵylymı-zertteý ınstıtýtynda boldy. Onda mekeme basshylyǵymen jáne qyzmetkerlerimen kezdesip, onyń materıaldyq-tehnıkalyq bazasymen tanysty.
Nurtóre Júsip ınstıtýt lıngvıstıka, qazaq tilin saqtaý jáne damytý salasyndaǵy zertteýlermen aınalysatyn Qazaqstannyń jetekshi ǵylymı mekemeleriniń biri ekenin atap ótti.
«Jaqynda Prezıdent Qasym-Jomart Toqaev belgili basylym «Ana tili» gazetine bergen suhbatynda elimizdegi qazaq tiliniń jaı-kúıi men damý keleshegi týraly máselelerge jan-jaqty toqtaldy. Memleket basshysy qazaq tiliniń bolashaǵy qoǵam ómiriniń túrli salasyna qanshalyqty tereń enetinine baılanysty ekenin atap ótti. Alda aýqymdy jumys kútip tur. Degenmen, onyń mán-mańyzyna degen senim men búkil memlekettik jáne qoǵamdyq ınstıtýttardyń belsendi qoldaýy arqasynda qazaq tili elimizdiń qazirgi álemde úılesimdi damýyn qamtamasyz etetin aqıqatqa aınalady. Qazaq tilin damytý ulttyq biregeılikti nyǵaıtady. Prezıdent pármenin eskere otyryp, ınstıtýt osy mańyzdy jáne kúrdeli mıssııada mańyzdy ról atqarady dep sanaımyn. О́ıtkeni, onyń til saıasaty, leksıkografııa jáne orfografııa boıynsha ǵylymı zertteýleri men jumystary elimizdiń qazaq tili men mádenı ortasynyń qalyptasýy men damýyna aıtarlyqtaı áser etedi», dedi Nurtóre Júsip.