Bıyldan bastap jeke tulǵalar mindetti deklarasııa tapsyrýdan bosatyldy. Bul jaǵdaı kásipkerlerdiń baıaǵydaı mobıldi aýdarymdardy alańsyz qabyldaı berýine jaǵdaı jasaı ma? Árıne, mundaı saýaldyń týyndaýy zańdy. Memlekettik kirister komıtetiniń habarlaýynsha, endigi kezekte taldaý krıterııi ózgertiledi, endi aýdarym sany ǵana emes, onyń jalpy kólemi de eskeriledi.
Komıtettiń málimdeýinshe, kásipkerlik qyzmetke qatysy bar krıterııge sáıkes keletin jeke tulǵalardyń shotyndaǵy operasııalardy ekinshi deńgeıli bankter baqylaýǵa alýǵa tıis. Sondaı krıterııdiń biri – úsh aı ishinde 100 jáne odan da kóp, ártúrli tulǵadan bızneske arnalmaǵan jeke shotqa somasy 3 tómengi jalaqydan asatyn aýdarymdardyń kelip túsýi. Bul – shamamen 255 myń teńge.
«Jańa erejege sáıkes ekinshi deńgeıli bankter kirister organdaryna mobıldi aýdarymdar týraly aqparatty kezeń-kezeńimen usynyp otyrýǵa tıis. 2025 jyly jeke kásipkerler, zańdy tulǵalar men olardyń jubaılary baqylaýǵa alynady. 2026 jyly basqa azamattar da tekserile bastaıdy», delinedi habarlamada.
Elimizde zańsyz kásipkerlik qyzmetke 15 aılyq eseptik kórsetkish (AEK) kóleminde aıyppul salý qarastyrylǵan. Zań buzýshylyq ekinshi ret qaıtalansa, aıyppul 30 AEK-ke deıin ulǵaıady. Bul – 117 960 teńge. Salyq salý obektilerin jasyryp qalý tólenbegen salyqtardyń 200%-y mólsherinde aıyppul salýǵa ákep soǵady. Memlekettik kirister komıteti ókilderiniń aıtýynsha, bul sharalar salyq tóleýden jaltarý áreketterin azaıtyp, elde bıznesti júrgizýge ádil múmkindik qalyptastyrady.
Aıta keteıik, taýarlar men qyzmetterdi usynǵany úshin aqysyn mobıldi aýdarym retinde jeke shotqa aýdartý kóleńkeli kásip sanalady. Ondaı tólemder úshin salyq ustalmaıdy, saldarynan qazyna túsýge tıis mıllıardtaǵan qarajattan qaǵylady. Sol úshin elde taýarlar men qyzmetter aqysyn arnaıy kassalyq apparat, QR-kod nemese POS-termınal arqyly tóleý mindettelip otyr.
Memlekettik kirister komıtetiniń habarlaýynsha, bastapqyda kásipkerler de, tutynýshylar da mundaı qatań tártipke úırenise alǵan joq. Degenmen keıingi ýaqytta buǵan birtindep beıimdelip kele jatqandary baıqalady. Bul óz kezeginde kishi, shaǵyn jáne orta bıznesten túsetin salyq túsimin molaıtýǵa septesedi. Alaıda komıtet atalǵan sýbektilerden túsken salyq túsimi somasyn jarııa etpedi.