Elordada áleýmettik sala mamandaryn daıarlaý máselesi talqylandy. Is-sharaǵa Ǵylym jáne joǵary bilim mınıstri Saıasat Nurbek, memlekettik organdar, joǵary oqý oryndary jáne úkimettik emes uıymdardyń ókilderi qatysty.
Mınıstrlik taratqan aqparatqa súıensek, «Ádiletti Qazaqstan: quqyq tártibi, ekonomıkalyq ósý, qoǵamdyq optımızm: JOO-dyń áleýmettik qorǵaý júıesiniń kadrlyq áleýetin arttyrýǵa qosqan úlesi» taqyrybyndaǵy talqylaýda áleýmettik qorǵaý júıesiniń kadrlyq áleýetin arttyrýǵa ýnıversıtetterdiń úlesin kúsheıtý jónindegi strategııalyq baǵyttar men praktıkalyq sharalar ortaǵa salyndy.
Jıynda sóz alǵan Ǵylym jáne joǵary bilim mınıstri Saıasat Nurbek álemde «ınklıýzııa» uǵymy qaıta qarastyrylyp jatqanyn atap ótti. «Bul – tek kedergisiz ortany qurý ǵana emes, fızıkalyq múmkindikteri joq kez kelgen adamdy nemese basqa shekteýleri bar adamdardy qosý. Dúnıejúzilik banktiń jobasy aıasynda biz pedagogıkalyq ýnıversıtetterdiń barlyq oqý baǵdarlamasyn fın seriktesteriniń kómegimen qaıta qaradyq. Munda 30 jańa oqý baǵdarlamasy ázirlendi, ınklıýzııa negizgi qaǵıdat bolyp tur. Muǵalimderdiń jalpy massasyn bólek daıyndaýdyń ornyna, biz ár muǵalim ınklıýzııanyń ne ekenin túsinip, sertıfıkattalýy úshin bárin birdeı daıyndaýdy sheshtik. Osy joba aıasynda 25 ýnıversıtet arnaıy kabınettermen jáne zertteý keshenderimen jabdyqtaldy», dedi mınıstr.
Qatysýshylar áleýmettik jumys boıynsha ınnovasııalyq kadrlardy daıarlaý problemalaryn, ýnıversıtetterdiń qatysýymen áleýmettik qorǵaý qyzmetkerlerine úzdiksiz bilim berýdiń ózekti máselelerin, sondaı-aq jumys berýshilerdiń áleýmettik jumys salasyndaǵy bolashaq mamandardyń quzyretterin qalyptastyrýǵa qosqan úlesin talqylady.
Al L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov: «Bizdiń joǵary oqý ornynda Áleýmettik jumys jónindegi bilim baǵdarlamalaryn belsendi damytyp keledi. Túlekterimizdiń tereń kásibı bilimge ıe bolýyna ǵana emes, sonymen qatar olardyń kásibı qyzmet salasynda týyndaıtyn praktıkalyq máselelerdi sheshýge daıyn bolýyn qamtamasyz etýge tyrysamyz. Bilim berý úderisi aıasynda biz áleýmettik jumys boıynsha álemdik tájirıbeni zerdeleýge jáne ınnovasııalyq tásilderdi engizýge kóp kóńil bólemiz», dep atap ótti. Rektordyń aıtýynsha, EUÝ Áleýmettik jumys teorııasy men tájirıbesiniń úzdik standarttaryn engizýge baǵyttalǵan Frankfýrt jáne Shanhaı ýnıversıtetterimen SOLID halyqaralyq ǵylymı jobasyn júzege asyryp keledi. Ýnıversıtet ǵalymdary sıfrlyq sheshimder arqyly halyqtyń osal toptarynyń máselelerin sheshýge arnalǵan «Sıfrlyq transformasııa jaǵdaıyndaǵy qazaqstandyq qoǵam: perspektıvalar men táýekelder» atty aýqymdy jobaǵa qatysyp jatyr. Sonymen qatar EUÝ men Eńbek jáne halyqty áleýmettik qorǵaý mınıstrligi birlesip áleýmettik saıasatty qoldaýǵa, onyń tıimdiligin arttyrýǵa baǵyttalǵan kásibı standarttar men bilim berý bastamalaryn ázirlep otyr.
Eńbek jáne halyqty áleýmettik qorǵaý vıse-mınıstri Asqarbek Ertaev áleýmettik jumys júıesin damytýdyń negizgi vektorlaryna toqtaldy. «Búginde Qazaqstanda 35 myńnan asa áleýmettik qyzmetker jumys isteıdi. Áleýmettik qyzmetkerlerdiń tek 12% ǵana – mamandandyrylǵan bilimge ıe. Bul olardyń belsendi daıarlyǵy men jańa mamandardyń qajettiligin kórsetedi. Kadrlardyń sapasyn arttyrý úshin bıyl halyqaralyq standarttardy eskere otyryp, kásibı standarttar ázirlendi. Bıyl 8,5 myńnan kóp áleýmettik qyzmetker mamandandyrylǵan oqýdan ótti. Kelesi jyldan bastap áleýmettik sala mamandary elimizdiń 14 joǵary oqý ornynda qaıta daıarlaýdan jáne biliktiligin arttyrýdan óte alady. Biz Eýrazııa ulttyq ýnıversıtetimen de memorandýmǵa otyrdyq», dedi vıse-mınıstr.
Kezdesý barysynda birqatar mamandar men sarapshylar sóz sóılep, baıandamalar jasady. Sonyń biri EUÝ-dyń áleýmettik-mádenı damý jónindegi prorektory Lázat Tólegenqyzy ýnıversıtettiń áleýmettik qyzmetkerlerdi daıarlaýdaǵy ınnovasııalyq áleýeti jóninde aıtty. Al astanalyq balalar men otbasyn qoldaý ortalyǵynyń basshysy Marııa Shýbına bilim baǵdarlamalary túlekteriniń áleýmettik jumystaǵy quzyrettiligine jumys berýshiniń kútýi men qosatyn úlesi týraly aqparatty bólisti. EUÝ sıfrlyq damý sektorynyń menedjeri Altynbek Zulhajav kórý qabileti nashar adamdarǵa arnalǵan «Inklıýzıvti gıd» navıgasııalyq júıesin tanystyrdy. Qatysýshylar sondaı-aq L.N.Gýmılev atyndaǵy EUÝ ınklıýzıvti qoldaý ortalyǵynyń jumysymen tanysty jáne keńeıtilgen otyrys aıasynda dóńgelek ústel ótti.