Májilistegi «AMANAT» fraksııasynyń depýtattary Janarbek Áshimjanov, Maksım Rojın men Maqsat Tolyqbaı Ile aýdany О́tegen batyr aýylyna arnaıy baryp, Mádenıet úıiniń qurylys barysymen tanysty. Olar jergilikti bılik jáne merdiger kompanııa ókilderimen kezdesip, jumys barysy men qarjylandyrý máselelerin talqylady, dep habarlaıdy Egemen.kz.
Aıta keteıik, О́tegen batyr aýylyndaǵy 400 oryndyq mádenıet úıiniń qurylysy birneshe jylǵa sozylyp keledi. 2022 jyly bastalǵan joba 2023 jyldyń maýsym aıynda paıdalanýǵa berilýge tıis edi. Alaıda búgingi tańda jumys tek jartylaı ǵana aıaqtalǵan. Qurylysty aıaqtaýǵa 800 mln teńgeden astam qarjy jetpeı otyr. Jobaǵa jaýapty taraptardyń áreketi men qarjynyń durys ıgerilmeýi Májilis depýtattarynyń nazaryn aýdardy.
Maksım Rojınniń aıtýynsha, joba bastapqyda durys jasalmaǵan. Kireberis bóligi qate josparlanyp, jer máselesi boıynsha da daý týyndaǵan. Qurylysqa qajetti qarajat ýaqytynda bólinbeı, merdiger óz qarajatymen jumysty jalǵastyrǵan. Nátıjesinde, qurylys materıaldary qymbattap ketken.
«Bul – óńirdiń áleýmettik damýy úshin óte mańyzdy joba. Nysannyń quny 2,2 mlrd teńge dep bekitilgen. Qarjy kezeń-kezeńimen bólinip keledi. Degenmen, jumys tıisti deńgeıde oryndalmaǵan. 2023 jyly paıdalanýǵa berilýi kerek edi, biraq tek jartysy ǵana daıyn. Qurylys toqtap tur. Bul jerde baqylaýdyń jetkiliksizdigi anyq baıqalady. Halyqqa ýáde berilgen bolsa, ony oryndaý – bizdiń ortaq mindetimiz. Biz bul máseleni qatań baqylaýǵa alamyz jáne barlyq jaýapty taraptardan naqty áreket talap etemiz», deıdi depýtat.
Ile aýdandyq qurylys bóliminiń basshysy Aıdos Kúnesbaıdyń málimetinshe, 2022 jyly 150 mln teńge, 2023 jyly 857 mln teńge bólingen.
«Bıyl 225 mln teńge bólindi. Qosymsha shyǵyndarǵa baılanysty 2023 jyldyń maýsym aıynda taǵy 404 mln teńge bólingen bolatyn. Soǵan qaramastan, qurylys belgilengen merzimde aıaqtalmady. О́tken jyldyń sáýirinde merzimdi taǵy uzartý týraly kelisim jasalyp, jobanyń aıaqtalý ýaqyty 2025 jyldyń shildesine shegerildi. Qazirgi tańda qurylysty tolyq aıaqtaý úshin qosymsha 805 mln teńge qajet», deıdi Aıdos Kúnesbaı.
Qazirgi ýaqytta qurylysqa qajetti qarjyny bólý máselesi Almaty oblysynyń bıýdjet komıssııasyna joldanbaqshy.
Aıta ketý kerek, «AMANAT» partııasynyń «Halyqpen birge!» saılaýaldy baǵdarlamasy aıasynda 2027 jylǵa deıin oblysta 25 mádenıet úıiniń qurylysy men 27 mádenı nysannyń sapaly kúrdeli jóndeý jumystary josparlanǵan. Bıyl 9 mádenıet úıiniń qurylysy men 6 mádenıet úıine kúrdeli jóndeý jumystary júrgizilgen.