Qostanaı qalasynyń «Bereke» shaǵyn aýdanynda taǵy bir kóp qabatty turǵyn úı paıdalanýǵa berildi. Jańa jylda baspana qýanyshyna ıe bolǵan 54 shańyraqtyń ishinde turǵyn úı kezeginde turǵan kópbalaly otbasylar, múmkindigi shekteýli jandar, jalǵyz basty analar bar.
«Rýdnyı Sokolov qurylys» kompanııasy salǵan alty qabat úıdi taıaýda Qostanaı qalasynyń ákimdigi satyp alǵan.
«Bul joly ákimdik halyqtyń áljýaz toptary úshin shamamen 5 mlrd teńgege 230 páter satyp aldy. Sizderge túsinikti bolý úshin mynadaı mysal keltireıin, biz turǵyndarǵa 2021–2023 jyldar aralyǵynda 267 jaldamaly páter berippiz. Al 2024 jyly, ıaǵnı sońǵy bir jyldyń ózinde ǵana 378 otbasyn baspanamen qamtamasyz etýdiń sáti túsip otyr. Bul – óte jaqsy kórsetkish. Byltyrdan bastap turǵyn úıdi tikeleı qurylys kompanııasynyń ózinen satyp ala bastadyq. Nátıjesinde baspana kezegi de tezirek jyljı tústi», dedi turǵyndardy qýanyshymen quttyqtaı kelgen qala basshysy Marat Júndibaev.
Baspanaly bolyp, qýanyshqa kenelip jatqandardyń ishinde kópbalaly analar da barshylyq. Mysaly, úsh bólmeli páterge qonystanǵan Tynybekovter otbasy buǵan deıin qalanyń mańyndaǵy aýylda páter jaldap turypty.
«Tórt jyldan beri kezekte turyp, osy kúndi taǵatsyzdana kúttik. Tórt bala tárbıelep otyrmyz. Jańa úı beretin bolypty degendi estigen balalarymyz baryp keleıikshi dep maza bermegen soń, ótken aptada kelip syrtynan kórip kettik. Búgin, mine, kiltimiz qolymyzda. Qala basshylyǵyna, biz sııaqty kópbalaly otbasylarǵa qamqorlyq tanytyp otyrǵan memleketimizge alǵysymyz sheksiz. Elimiz aman, irgemiz tynysh bolyp, kóbeıe bereıik», deıdi tórt balanyń anasy Aıman Tynybekova.
Qazir «Bereke» shaǵyn aýdanynyń kósheleri keńeıtilip, aınalasy abattandyrylyp jatyr. Aldaǵy ýaqytta bul shaǵyn aýdandy Qostanaıdyń ortalyǵymen baılanystyratyn tóte jol salý josparda bar.
Qostanaı oblysy