Baıǵanın aýdandyq polısııa bólimi ákimshilik polısııa bólimshesiniń avtoınspektory, kapıtan Ádilqahar Qadyrov bir otbasyn ajaldan qutqaryp qaldy.
Oqıǵa byltyr 1 naýryz kúni bolǵan edi. Tańǵy saǵat 07.30 shamasynda Ádilqahar jumysqa shyǵyp bara jatyp, qarama-qarsy turatyn kórshisiniń esik-terezesinen qoıý tútin shyǵyp jatqanyn kórgen.
«Ol kezde men eshteńe oılaǵan joqpyn. Bul úıde jeti adam turady. Basyma birden «olar aman ba eken?» degen oı keldi. Sol kúni úıde úsh jas balasymen anasy ǵana bolypty. Kórshim vahtalyq jumysta, áke-sheshesi Aqtóbege ketken. Jaqyndap baryp, úıde kim bar dep aıqaıladym. Dybys joq. Sodan syrtqy kıimimdi sheship tastap, betimdi qarmen ysqylap alyp, tereń dem aldym da, úıge kirip kettim. Úıdiń ishindegi qoıý tútinnen eshteńe kórinbeıdi. Ári qaraı esimde eshteńe joq», deıdi Ádilqahar Ulyqpanuly.
Jalyn úıdiń ishine túgel taralmaǵan. Bir bólmede uıyqtap jatqan balalardyń anasyn oıatyp, syrtqa shyǵarady. Balalar bul bólmede joq eken. Anasy shyrqyrap, balalar jatqan bólmeni nusqaıdy. Ol jaqqa barý múmkin emes. О́rt sol bólmege jaqyn jerden tutanǵan sııaqty. Adamdy tunshyqtyryp, kózin ashtyrmaıtyn qoıý tútin lyqsyp, kúsheıip barady. Ádilqahar balalar bólmesiniń esigin ashyp, daýystaǵanda, eshkim ún qatpaǵan. Tútin men ıiske shydap turý múmkin emes. Ol qarmanyp jerdi sıpalaı bergende, qoly balaǵa tıdi. Ony eki qolymen kóterip aldy da, syrtqa umtyldy. Bul kezde kórshiler de jınala bastaǵan. Júgirip kelgen adamǵa balany ustatty da, beti-qolyn ysqylap, birneshe ret tereń dem alyp, úıge qaıta umtyldy. Ádilqahar kirgen jaǵyna qaıta umtylyp, jańaǵy jerden taǵy bir kishkentaıdy taýyp, syrtqa júgirdi. Biraq ýly gazdan basy aınalyp, kózi qaraýytyp barady. Býyndarynan ál ketti. Basynda esimnen tanyp, ottyń ishine qulap qalmaıyn degen ǵana oı bar. Táltirektep, júregi loqsyp, syrtqa ázer shyqty. Bul kezde úıdiń ishin túgel sharpyǵan jalyn úıdiń shatyryna deıin jetken. Jınalǵan jurt qoldaryna túsken zatpen órtti sóndirýmen álek. Esin jınaǵan kelinshek tórt jastaǵy ulynyń qalǵanyn aıtyp shyryldaıdy. Oılanýǵa ýaqyt joq. Birer sekýnd keshikse, baladan aıyrylady. Basy aınalyp tursa da, órtke úshinshi ret kirýge májbúr. Balalardyń jatqan jerin biledi. Tez jetse boldy. Irgede jatqan kishkentaıdy sıpalap taýyp, kóterip alsa da, esikke deıin jetý – muń. Bas aınalyp, qulap barady. Kóz kórmeıdi. Birer sekýndta bul jer qyp-qyzyl órtke aınalady. Qaıtkende de qulap qalmaý kerek. Shyǵa almaı qalsa she? Bul kezde oqıǵa ornyna jetken órt sóndirýshiler men jedel járdem qyzmetkerleri Ádilqaharǵa kómekke kelip, qulap bara jatqan ony balamen birge aýrýhanaǵa alyp ketedi. Tórteýi de esin aýrýhanada jınap, birneshe kún emdeldi.
Tań aldynda elektr togynyń qysqa tuıyqtalýynan bolǵan órt áp-sátte bir úıdiń tórt adamynyń ómirine osylaısha qater tóndirdi. Jumysqa bara jatqan polıseı terezeden shyqqan tútindi kórip, jedel áreket etpegende, tórt jan órt ishinde qalar ma edi?
Qaraýylkeldi aýylynyń turǵyndary Tabyn Bókenbaı batyr kóshesinde bolǵan alapat órtti umytqan emes. Osy jaǵdaıdy estı sala jumys ornynan jetken úıdiń otaǵasy men úlkenderi Ádilqaharǵa alǵysyn jaýdyrdy. Jazda órtengen úıdi súrip tastap, kórshiniń úıin satyp aldy. Bular áli de kórshi. Ádilqahar aman qalǵan úsh bala úshin álemdegi eń batyr, eń kúshti adamǵa aınaldy. Batyr polıseı osy oqıǵany eske alǵysy da kelmeıdi.
«Sol kúni meniń ornymda bolǵan kez kelgen adam osylaı áreket eter edi. Shynymdy aıtsam, aýyldaǵy órt oqıǵasynyń jarııa bolǵanyn qalamadym. Áleýmettik jelige qalaı shyǵyp ketkenin de bilmeımin. Bireýler salǵan bolar. Aýrýhanada jatqanymda áleýmettik jelidegi jazbalardy jiberdi. О́rtke qalaı kirgenimdi ǵana bilemin. Basqasy esimde joq», deıdi batyr polıseı.
Sheshimdi de, kesimdi adamnyń sózi. Kózsiz erlik jarııalylyqty súımeıdi. Erlik – oılanýǵa ýaqyt ta, múmkindik te joq kezde jasalatyn áreket. Erliktiń qarapaıym erejesi – osy. Ádilqahar tipti fotosýretin jarııalaǵandy da qajet etpedi. 2014 jyldan beri Baıǵanın aýdandyq ishki ister bóliminde qyzmet etetin qarapaıym jigittiń ómirlik ustanymy – osyndaı.
Aqtóbe oblysy