Aqtóbe oblysy Baıǵanın aýdanynyń turǵyny Baqyt Beknııazova úsh jyl buryn memleketten jaldamaly úı alǵan edi. Alaıda onyń bul qýanyshy uzaqqa barmady. Páterge kirisimen ájethanasy káriz sýyna tola bastady. Másele áli kúnge deıin sheshilmegen, dep habarlaıdy Egemen.kz.
B.Beknııazovanyń aıtýynsha, Baıǵanın aýdany Aeroport kóshesindegi eki qabatty úı osydan úsh jyl buryn paıdalanýǵa berilgen.
«Úı ishindegi ájethanany káriz sýy basqan. Súrtip, keptirip qoıamyn, qaıta tolyp qalady. Keıin ákimdikke baryp kómek suradym. Olar káriz qubyry bitelip qalǵanyn aıtady. Biraq qazir las sý qubyrdan ǵana emes, edendegi qysh taqtaıshalarynyń arasynan da kirip jatyr. Bizge kómek kerek», dedi aýyl turǵyny Baqyt Beknııazova.
Dál osy úıdiń turǵyny Gúlzat Esenbaeva da úıdiń sapasyna kóńili tolmaıtynyn aıtty. Terezesinen jel soǵatyn bolǵan soń amaldap, skochpen bitep qoıǵan. Sonymen birge qabyrǵasynda jaryq bar kórinedi.
Turǵyndar jibergen vıdeodan páter ishinen bólek ortaq dálizge de káriz sýy kirip jatqanyn kórýge bolady. Bul bir ǵana otbasynyń emes, birinshi qabattaǵy turǵyndardyń ortaq problemasy. Olardyń oıynsha, jer astynda qubyr jarylǵan bolýy múmkin.
Bul máselege Baıǵanın aýdandyq ákimdigi óz jaýabyn berdi. Ákimdik turǵyndardyń ózine kiná artyp otyr.
«Bul úı 2021 jyly osal toptaǵy adamdarǵa paıdalanýǵa berildi. Úıdiń káriz qubyry túrli turmystyq zattarmen bitelip qala beredi. Qubyr bitelgen saıyn tirkep otyramyz. Turǵyndardyń eshqaısysy moınyna almaıdy. Munda 16 páter bar. Árqaısysymen jeke-jeke jınalys ótkizildi. Esh nátıje bermeı otyr. Janynda ózge de eki qabatty úıler bar. Olarda eshqandaı másele joq, másele tek osy úıde bolyp tur. Kelisimshart boıynsha adamdar ózderi kútip ustaýy tıis», dedi Baıǵanın aýdany ákiminiń orynbasary Rústem Raýshanov.