Aqpannyń 7-11 aralyǵynda Qytaıdyń Harbın qalasynda qysqy Azııa oıyndary ótedi. Aq alamanda mánerlep syrǵanaýdan synǵa túsetin qurama jasaqtaldy.
Ulttyq quramanyń jattyqtyrýshylar shtaby jekeleı synda Mıhaıl Shaıdorov, Dıas Jırenbaevqa senim artpaq, qosalqy qatysýshy Rahat Bralın de qatarda. Áıelder arasynda Sofıa Samodelkına men Sofıa Farafonova synǵa tússe, qosalqy qatysýshy Anna Levkoves te Harbınge barady. Muz ústindegi bı saıysyna Gaýhar Naýryzova men Baısanǵur Dátıev juby qatysady.
Qysqy Azııa oıyndary sońǵy ret 2017 jyly Japonııanyń Sapporo qalasynda ótti. Mánerlep syrǵanaýdan Sochı qysqy Olımpıadasynyń (2014) qola júldegeri Denıs Ten jaraqaty syr berip, júldege jete alǵan joq. Áıelder dodasynda Elızabet Tursynbaeva qola júlde enshiledi.