Almatyǵa poıyzben attanatyn jolaýshylar endi jaıly ári keń vagondarmen saparlaýǵa múmkindik alyp otyr. Petropavl vagon jasaý zaýytynda Tver vagon jasaý zaýytynyń tehnologııasymen jasalǵan jańa vagondar Pavlodar – Almaty – Pavlodar baǵytynda júre bastady.
Pavlodardan Almatyǵa deıingi júrý ýaqyty – 26 saǵat 44 mınýt. Bir baǵytqa bılet quny – kýpege 15 072 teńge, plaskartqa 9 945 teńge. Jalpy 3 poıyz quramy, 15 vagon (8 kýpe jáne 7 plaskart) jumyldyrylǵan.
Vagondardy jańartý jáne jolaýshylar tasymalynyń sapasyn arttyrý maqsatynda ózgerister engizilip jatyr. Petropavl qalasyndaǵy otandyq vagon jasaý zaýytynda óndirilgen jolaýshylar vagony atalǵan baǵytta júre bastady. «Jolaýshylar tasymaly» AQ Petropavl vagon jasaý zaýytymen 157 vagondy jetkizý boıynsha shart jasady. Osy kelisim aıasynda 50 vagon jetkizilip, №31/32 «Pavlodar – Almaty» baǵytyna jiberildi», deıdi «Jolaýshylar tasymaly» AQ baspasóz hatshysy Narıman Dúısekeev.
Jańa vagondar aýany baptaý júıesi, tútin detektory, bıodárethana jáne tambýrdaǵy beınebaqylaý júıesimen jabdyqtalǵan. Jolaýshy jaılylyǵy úshin kýpelerde elektr rozetkasy men USB porttar qarastyrylǵan. Plaskart – 52 oryn, kýpe – 36 orynǵa laıyqtalǵan. Qazir kompanııaǵa 2 171 vagon tıesili. 2030 jylǵa deıin eskirgen vagondardy esepten shyǵarý josparlanǵan. Parkti jańartý aıasynda jańa vagondar satyp alynady. Keıingi 10 jylda aksıonerlik qoǵamnyń vagondar parki 50%-ǵa jańarǵan. Sonymen qatar «Stadler Bussnang AG» kompanııasymen 2025–2030 jyldar aralyǵynda «Stadler» tehnologııasy boıynsha 557 vagon satyp alý týraly kelisimshart jasalǵan.
Sonymen birge jańa vagondar Atyraý – Mańǵystaý, Aqtóbe – Atyraý, Pavlodar – Túrkistan, Astana – Semeı, Almaty – Jezqazǵan baǵyttarynda qatynaıdy.
Pavlodar oblysy