Mázirde DDU-nyń qant pen tuzdy azaıtý boıynsha usynystary eskerilgen, dep habarlaıdy Egemen.kz.
Densaýlyq saqtaý mınıstrligine qarasty Sanıtarııalyq-epıdemıologııalyq baqylaý komıteti jetekshi beıindi sarapshylarmen birlesip bilim berý uıymdaryna arnap ázirlegen «Úlgilik perspektıvalyq mázir» – qaýipsiz, teńdestirilgen jáne ǵylymı negizdelgen, balalardyń fızıologııalyq qajettilikteri men kalorııasyn eskere otyryp jasalǵan, onda jas erekshelik sanattary, maýsymdylyǵy, sondaı-aq as blogy joq mektepterdegi balalardyń tamaqtanýy eskerilgen.
Mázirde DDU-nyń semizdik, qant dıabeti, júrek-qan tamyrlary jáne basqa da aýrýlardyń damý qaýpin azaıtý úshin qant pen tuzdy azaıtý boıynsha usynystary eskerilgen. Mysaly, balalar táýlik boıy bolatyn uıymdar úshin qant mólsheri 6-10 jas erekshelik tobynda – 55 g-nan 15 g-ǵa deıin, 11-14 jas erekshelik tobynda – 70 g-nan 21 g-ǵa deıin, ıaǵnı 3,3-3,6 ese azaıdy. Tuz 6-10 jas erekshelik tobynda – 15 g-nan 3 g-ǵa deıin, 11-14 jas erekshelik tobynda – 15 g-nan 4,5 g-ǵa deıin, ıaǵnı 3,3-5 ese azaıdy.
Negizgi mázirge et, balyq, kókónis taǵamdary, jańa pisken kókónisten jasalǵan salattar jáne qant mólsheri az sýsyndar kiredi.
Balalardyń ósýi men damýy, sondaı-aq aýrýlardyń aldyn alý úshin rasıonǵa maıy az sút, probıotıkteri bar sút qyshqyly ónimderi kiredi, oǵan qosa kókónis pen jemis-jıdek kólemi arttyrylǵan.