Aqtóbe oblysyna sapary barysynda Májilistiń vıse-spıkeri Danııa Espaeva men depýtat Juldyz Súleımenova kópsalaly oblystyq balalar aýrýhanasy ujymymen kezdesti. Jıynda medısına salasyndaǵy máseleler men osy salada qabyldanyp jatqan zańnamalyq ózgerister talqylandy, dep habarlaıdy Egemen.kz.
Danııa Espaeva Májilis qabyrǵasynda atqarylǵan jumystarǵa, onyń ishinde dárigerlerdi qorǵaýǵa, olardyń mártebesin kóterýge baǵyttalǵan jańa zańnyń tıimdiligine nazar aýdardy.
«О́tken jyly 106 zań jobasy Májilis qaraýyna engizilip, 37-sin qarastyrdyq. Onyń 19-na Prezıdenttiń qoly qoıyldy. Qazan aıynda Medısına qyzmetkerleriniń kásiptik jaýapkershiligin saqtandyrý týraly zańdy qaradyq. Qazirgi kezde osy zańnyń júzege asyrylý barysyn sizdermen talqylaýǵa daıynbyz», dedi Danııa Espaeva.
Juldyz Súleımenova óz sózinde MÁMS-ke qatysty turǵyndar arasynda syn-pikirler kóbeıgenin atap ótti. Kezdesýlerde azamattar saqtandyrý júıesine qosylsa da, medısınalyq qyzmetti tolyq kólemde ala almaı otyrǵanyn jıi aıtyp júr. Sondyqtan da qazirgi júıe Densaýlyq saqtaý mınıstriniń qatysýymen áli de talqylanatyn bolady.
«Aýylda medısına ınfraqurylymyn damytýǵa kóp kúsh salyp jatyrmyz. Byltyr «AMANAT» partııasynyń depýtattary aýyldyq jerlerge baratyn dárigerler úshin bir rettik kóterme aqyny, ıaǵnı eń tómengi jalaqynyń 100 eselengen mólsherin engizdik. Bul sapaly mamandardy aýylǵa tartýǵa múmkindik beredi», dedi Juldyz Súleımenova.
Hırýrg professor Bolat Janalıev sońǵy 5 jylda balalar aýrýhanasynan birde-bir dáriger mamandandyrý boıynsha shetelden bilimin jetildirýge shaqyrylmaǵanyn atap ótti. Sondaı-aq dárigerler medısınalyq qural-jabdyqtardyń jáne ota jasaýǵa bólinetin qarajattyń jetkiliksizdigin aıtyp, aýdanaralyq hırýrgııalyq bólimsheler ashý týraly usynystaryn jetkizdi.