«QazJeńilО́nerkásipAlmaty» kıim fabrıkasynyń bólimshesi sanalatyn «Alataý» JShS Jambyl aýdanyndaǵy ónerkásiptiń órisin keńeıtip otyr. Iske qosylǵanyna eki jylǵa jýyqtaǵan kásiporyn jumysy ýaqyt ótken saıyn qarqyn alyp, otandyq tiginge tapsyrys kólemi artyp keledi. Kásiporynnyń tigin mashınalarymen jabdyqtalýyna bastapqyda 230 mln teńge ınvestısııa tartylǵan. 30 shaqty adamdy eńbekpen qamtyǵan tigin sehynda búginde 100-ge jýyq jumysshy eńbek etedi. Olardyń basym bóligi – Uzynaǵash aýylynyń turǵyndary.
– Eńbekke ebi bar qyz-kelinshekterdi kompanııa ókilderi daıyndyq kýrsynan ótkizip, tigin mashınasynyń tilin úıretti. Sodan soń tehnologter kómegimen óndiris úrdisin ıgertti. Nátıjesinde, olar tez arada ismerlik sheberlikterin shyńdap, zamanaýı qurylǵylardy emin-erkin ıgerip aldy, – deıdi tigin sehynyń sheberi Zýlfııa Sadyrnııazova.
Onyń aıtýynsha, eńbekaqy árkimniń naqty oryndaǵan jumys kólemine qaraı tólenedi. Tapsyrysty jyldam ári sapaly atqarǵan tiginshilerdiń aldy aıyna 400 myń teńgege deıin tabys tabady eken. On saýsaǵynan óner tamǵan tiginshiler ornalasqan sehtyń jumysy qat-qabat.
Arnaıy ólshemmen pishilip, kesilip kelgen kıim bólshekterin bir-birine jalǵaı tigip, tynymsyz eńbek etip jatyr. Tabys kólemin ulǵaıtý úshin ónimdi eńbek qajettigin jete sezinetin qyz-kelinshekter ýaqytty utymdy paıdalanýǵa tóselgen.
– Qorǵanys mınıstrligi men Ulttyq ulan gvardııasy jáne shekara qyzmetkerlerine, sondaı-aq temirjol salasynyń mamandaryna arnaýly kıim túrlerin tigetin kásiporyn eńbekkerleri ózderine alǵan mindetterin abyroıly atqaryp, 2024 jyldy tabyspen aıaqtady. Kásiporynnyń joǵary sapaly kıimderine elimizben qatar, Reseıden tapsyrys túsip, ony da jetkizip berdik. Byltyr jeltoqsanda Qorǵanys mınıstrliginiń tapsyrysymen 58 myń dana trıkotajdyq kıim jıyntyǵyn tigip bitirdik. Memlekettik tapsyrysty ýaqtyly aıaqtaý úshin kúnine 2 500 dana kıim jıyntyǵy tigildi. Endi bas kıimderdi tigýdi bastap kettik, – deıdi «Alataý» JShS óndiris basshysy Muhambetqalı Sabyrov.
Eńbek ujymy ótken jyldyń sońynda óndiris aıasyn keńeıtý maqsatynda aıaq kıim tigetin sehty iske qosty. Alǵashqy kúnniń ózinde 20 jumysshy 1 620 par aıaq kıim tigipti. Táýligine 2 000 dana aıaq kıim tigýdi josparlaǵan kásiporynnyń bul bóliminde de jumys qyzý. Aıaq kıim sehy túgeldeı nemis tehnologııasymen jabdyqtalǵan. Avtomattardyń tetiginde operator otyrady. Jumystyń keı bóligin robottar atqarady. Sehtyń iske qosylǵanyna eki apta ǵana ótkenimen, operatorlar zamanaýı tehnıkanyń tilin meńgerip, qultemirdi tıimdi basqarýdy úırenip alǵan.
Kásiporynda tigiletin kıimge qajet matalar О́zbekstan men Qytaıdan alynsa, aıaq kıimge kerek bylǵary irgedegi Boraldaı men sonaý Belorýsııadan ákelinedi. О́ndiris aýmaǵyn keńeıtý maqsatynda 2 gektar jer alǵan «Alataý» JShS-niń ınvestısııa kólemi jyl sońynda 1 mln 550 myń dollardy quraǵan. Oǵan zamanaýı qurylǵylar satyp alynǵan.
Jalpy, Jambyl aýdanynda taıaý merzimde 4 ınvestısııalyq joba iske asyrylmaq. Onyń jalpy quny 90 mlrd teńgeden asady. Nátıjesinde 3 000-nan asa adam turaqty jumyspen qamtylady.
Almaty oblysy