Byltyrǵy kóktemde Qulsary qalasyn Jem ózeniniń arnasynan asqan tasqyn sý basqan edi. Sol kezde talaı turǵynnyń úıi sý astynda qaldy.
Tasqyn sýdan zardap shekkenderdiń qatarynda Asqar Tolybaev ta bar. Ol Jylyoı aýdanynyń ortalyǵy – Qulsary qalasynda ómirge kelgen. Osy shaharda eńbek jolyn bastap, otbasyn qurǵan. Áıeli Amangúl Qalenovamen birge 1 ul, 1 qyz tárbıelep, kindik kesken mekeninde áli de turyp jatyr.
«Áıelim ekeýmiz «Teńiz» ken ornynda vahtalyq tásilmen jumys isteımiz. Jumys isteıtin kompanııalarymyz bólek bolǵanymen, vahtaǵa bir mezgilde baramyz. Sý tasqynynan 5 kún ótken soń úıimizge keldik. Aýlanyń ishinde tereńdigi tizege jaqyn sý turdy. Tasqyn sý úı men saraıdyń da, garajdyń da ishine kirgen. Muny kórip, ishimiz «órtenip-aq» ketti. Bul adamdy kúızeliske túsiretin jaıt ǵoı. Biraq Jem ózeniniń tasyǵanyna ne isteı alasyń? Oǵan kimdi kinálaısyń?», deıdi A.Tolybaev.
Tasqyn sý basqan úıin kórip, abdyrap júrgende inisi telefon shalypty. Ahýaldan habardar bolǵan soń «Endi ne istep júrsińder?» dep surady.
«Mundaıda ne aıtaryńdy bilmeısiń. Áıelim ekeýmiz aýlaǵa shyǵyp, tasqyn sýdy keship júrmiz. Sol sátte úılený toılarynda kóp aıtylatyn myna bir tilek esime túse ketti. Bizdiń toıymyzda da aıtylǵanyn umytqan joqpyn. «Úılenip jatqan kezde qos aqqýdaı kólde qatar júzińder dep edi. Mine, sol tilek 34 jyldan keıin qabyl bolyp, bir-birimizdi jetektep, qos aqqýdaı kólde júrmiz» dep, ázil-shyny aralas beınejazba túsirdim. Ony inimniń suraǵyna jaýap retinde jibergen edim», deıdi ol.
Keıin sol jazba áleýmettik jelige júktelip, kópshilikke taralǵan. Jeli qoldanýshylary erli-zaıyptylarǵa jyly pikirlerin bildirdi.
«Sý basqan úıimizge sarapshylar men baǵalaýshylardy shaqyrdyq. Mamandar saraptaý, baǵalaý qorytyndysyn shyǵardy. Soǵan sáıkes ótemaqy qarjysyn aldyq. Keıbir turǵyndar ózge qalalarǵa qonys aýdaryp jatty. Al biz kindik qanymyz tamǵan mekenimiz – Qulsary qalasynan ketkimiz kelmedi. Onyń ústine talaı qýanyshymyzdy atap ótken úıimizdi qımadyq. Sóıtip, memlekettiń qoldaýymen úıimizge kúrdeli jóndeý jumysyn júrgizdik. Mamandardyń qorytyndysyna baılanysty garaj ben jazǵy saraıymyzdy buzyp tastadyq. Qazir sol ystyq uıamyzda turyp jatyrmyz», deıdi A.Tolybaev.
Jańa jyl qarsańynda erli-zaıyptylardy «Qyzyq Times» jobasyna shaqyrdy. Jobany uıymdastyrýshylar «Qos aqqý» atanǵan Asqar Tolybaev pen Amangúl Qalenovaǵa «Jyl juby» atalymyn, Dýbaıda demalýǵa joldama tapsyrdy.
«Dál bulaı elge tanymal bolamyz dep oılamap edik. Sý keship júrgendegi jazba tanymaldylyq úshin emes, sol kezdegi basymyzdaǵy jaǵdaıdy kórsetý úshin túsirilgen edi. Dýbaıda demalýǵa áli jınala qoıǵan joqpyz. Vahtalyq jumysqa bara jatyrmyz. Demalysty keıin oılastyratyn bolarmyz», deıdi A.Tolybaev.
Atyraý oblysy