Ǵapyl dúnıe, ǵaıyptan, bir búıiri opyrylyp túskendeı bop, muńǵa batyp, esin jııa almaı qalǵandaı ma? Onyń taltústegi tosyn kún kúrkirindeı kúńirenisi men kúlbilteli solǵyn kúmbiri qulaqqa emis-emis shalyndy... «Arystan ákem fánıden baqıǵa attanyp ketti, AQSh-tyń Merılend shtatyndaǵy úıinde, bala-shaǵasynyń ortasynda, 2025 jylǵy qańtardyń 9-y, jergilikti ýaqyt boıynsha saǵat 19.55-te (Qazaqstan ýaqty boıynsha qańtardyń 10-y, saǵat tańǵy 05:55)». Bul qazaq halqyn óksitken qaraly habardy jetkizgen klassık jazýshy Muhtar Maǵaýınniń uly Edige edi...
Elpeń qaqqan qarapaıym Edige osydan tórt-aq aı buryn, byltyrǵy jyldyń qyrkúıeginiń basynda Kemerde turyp jatqanyna bir jyl bolǵan Muhtar aǵamyzǵa sálem bere barǵanymyzda, elpildep aldymyzdan shyǵyp, elgezektik tanytyp edi. Oń qolyndaǵy taıaǵyna salmaǵyn sala qısań etip ornynan kóterile qonaqtaryna yqylastana qolyn sozyp, kúreńitken solǵyn júzine kúlki demdep, kózi jaınap qoıa bergen Muhań aǵamyzdy Baqytjamal jeńgeı: «Atasy-aý, baıqa, baıqasańshy», dep súrinip-qabynyp qalar ma eken degendeı, súıemeldep zyr qaqqany esmimizde...
Dastarqan basy áńgimemen qyzǵan edi. Muhań kóbine-kóp estelik aıtty. Bárin túıindeı kele Qazaqstannyń bolashaǵyna zor úmitpen emeýrin tanytty. Sheshen sheshilgende shejireli tarıh kómbesinen tógiledi eken, búgingi el táýelsizdiginiń mańyzy myń batpan altynnan salmaqtana túsedi eken-aý, deseıshi. Kórikti keskini el amandyǵymen ajarlanǵan asyl aǵamyz týǵan jerge degen saǵynyshyn kókireginde qundaqtap, ósken óńirin, qyrandaı túlegen Almatysyn ańsaǵandaı, bizdiń bar bolmysymyzǵa úńile túsip, qyraǵy janarymen sylap-sıpaı masattanyp, quddy, saıyn dalasynyń juparly jýsanyn ıiskegendeı, demin jıilete aýa qarpyp, áıdik qýanyp qalyp edi-aý.
Saǵat tilin qımastyq sezimniń qylymen qansha baılap, tejep tastaǵymyz kelgenmen, esh ámirge baǵynbaıtyn ýaqyt shirkin, sol joly bizderdi qoshtastyrǵan bolatyn. «Kelesi kezdeskenshe, Muhtar aǵa!» – dep, qyrkúıektiń jıyrmasynda AQSh-qa attanǵaly otyrǵan ǵajaıyp adammen qımastyqpen qushaq jazysqan edik...
Kúlli qazaq elin alyp qushaǵyna syıdyrǵan alyp jazýshy syrt jerde máńgilik ómirine attanyp ketti. Arýaqty jazýshynyń eline degen amanaty eren eńbekterimen eselene túspek, el bolashaǵyna tileýles bolmaqshy!
Qaısar ÁLIM,
Qazaqstannyń eńbek sińirgen qaıratkeri