Byltyr mamyr aıynda Aqtaýda bes jigit fıtnes jattyqtyrýshysy bolyp jumys isteıtin sportshy qyzdy urlap ketip, birneshe saǵat boıy kúshtep ustaǵany BAQ betterinde jarııalandy. Oqıǵadan soń jábir kórgen boıjetken 9-qabattan sekirip kóz jumdy. Al marqumnyń týysy kinálilerge kesilgen sottyń úkimimen kelispeıdi, dep jazady Egemen.kz.
Almaty.tv arnasynyń habarlaýynsha, boıjetken jumysynan shyǵyp, úıine jaıaý qaıtqan. Sol kezde birneshe er adam ony avtokólikke kúshpen otyrǵyzyp, belgisiz jaqqa alyp ketken. Fıtnes jattyqtyrýshy bolyp jumys istegen Alına olarmen qarsylaspaq bolady, biraq onysynan túk shyqpaıdy. Marqumnyń inisi Baýyrjan Joljan «zińgitteı jigitter qyzdy kólikke tıep, kózin baılap, belgisiz baǵytqa alyp ketken» deıdi.
«Eger de aıtqanymdy istemeseń, tyr jalańash sheshindirip, tórt erkektiń arasyna salyp jiberem degen. Mashınada qorlaǵan. Olardyń barlyǵy da mefedron esirtkisiniń kúshimen júrgen», dedi marqumnyń inisi Baýyrjan Joljan.
Basty kúdikti jas qyzdy kólik ishinde zorlap bolǵan soń da jábirlenýshini erkine jibermegen. Kerisinshe, ony gaz quıý beketiniń kúzetshi otyratyn bólmesinde qamap ustaǵan.
«Bizden qutylý úshin aqsha berýiń qajet» deıdi. Sol jerde mobıldi qosymsha arqyly ápkemniń atyna 2 mln teńge nesıe rásimdeıdi. Janarmaı beketiniń artyna kóligin qoıyp, tań atqanǵa deıin osynda ustaıdy. Sosyn ápkemdi saǵat 11:00-de úı jaǵynan túsirip ketedi. «Eger sen bul jaǵdaıdy aıtatyn bolsań, áke-shesheńdi, seniń de qaıda turatynyńdy bilemiz, barlyǵyn óltiremiz dep qorqytqan», deıdi marqumnyń inisi.
Osy oqıǵadan tórt kún ótken soń, ıaǵnı 18 mamyrda Alına Serikova 9-qabattan sekirip, kóz jumady. Týystary onyń bul áreketine «bes jigittiń qorlyq kórsetkeni sebep boldy» dep otyr. Al marqumnyń inisi sot úkimimen kelispeıdi. Basty kúdikti sanalǵan 33 jastaǵy azamat Qylmystyq Kodekstiń 8-baby boıynsha 20 jylǵa bas bostandyǵynan aırylǵan. Basqa eki jigit – 7 jylǵa, al qalǵan ekeýi 8 jylǵa jaza arqalǵan. Ile-shala oblys prokýratýrasy da sottyń úkimine apellıasııalyq shaǵym túsirdi. Qazirgi tańda is apellıasııalyq satyda qaralýda.