Túrkistan oblysyndaǵy Tóle bı aýdanynyń polıseıleri densaýlyǵy nasharlaǵan qyzǵa alǵashqy medısınalyq kómek kórsetken, dep habarlaıdy Egemen.kz.
Keshki ýaqytta kóshe boıynda kele jatqan 16 jastaǵy qyzdyń denesi qurysyp, esinen tanyp qalǵan. Sol mańaıdaǵy adamdar jedel járdem shaqyrǵan.
Qyzmettik mindetterin atqaryp júrgen polıseıler jaǵdaıdy baıqap, oqıǵa ornyna bet alǵan. Olar jasóspirim demin áreń alyp jatqanyn kórgen. Tártip saqshylary áýeli qyzdyń tynys alýy úshin qoldan kelgenniń bárin jasap, keıin ony qyzmettik avtokólikpen (jedel járdemdi kútpeı) aýdandyq aýrýhanaǵa jetkizgen. Qazir qyzdyń ómirine qaýip tónip turǵan joq.
Anyqtalǵandaı, ol qonaqqa bara jatyp, kútpegen jerden aýa jetpeı, álsiregen. Qyzdyń ata-anasy der kezinde kómek qolyn sozǵan polıseılerge alǵys bildirdi.