Premer-mınıstrdiń birinshi orynbasary Roman Sklıardyń tóraǵalyǵymen Investısııalar tartý jónindegi keńestiń kezekti otyrysy ótti. Investısııalyq shtab otyrysynda negizgi kásiporyndardy jańǵyrtýǵa, jańa jumys oryndaryn qurýǵa jáne ınnovasııalyq óndiristerdi damytýǵa baǵyttalǵan ınvestısııalar týraly kelisimderdiń negizgi talaptary qaralyp, maquldandy.
Jıyn barysynda «Qarmet» AQ-men Investısııalar týraly kelisim maquldanǵany málim boldy. 2024 jyly kompanııa óziniń ınvestısııalyq mindettemelerin oryndaý sheńberinde joǵary qaıta bólý klasterlerin qurý úshin zaýytty jańǵyrtýǵa jáne ınfraqurylymdy damytýǵa 1,3 mlrd dollar ınvestısııalady. Bul rette uzaqmerzimdi strategııa sheńberinde kásiporyn 2028 jyldyń sońyna deıin ınvestısııalyq jobalardy iske asyrýǵa 3,5 mlrd dollar baǵyttaýdy josparlap otyr. «Qarmet» AQ zaýytyn jańǵyrtý óńirdiń áleýmettik-ekonomıkalyq damýyndaǵy mańyzdy qadam bolmaq.
Sonymen qatar Soltústik Qazaqstan oblysynda «Ultradecor Trading Kazakhstan» JShS baǵdarlanǵan jońqa jáne lamınattalǵan aǵash-jońqa taqtalaryn shyǵaratyn zaýyt salý boıynsha ınvestısııalar týraly kelisim jasasý maquldandy. Jobany iske asyrý óńdeý ónerkásibin damytýdyń mýltıplıkatıvtik áserin týdyrady jáne ekonomıkaǵa shamamen 82 mlrd teńge ınvestısııa ákeledi.
Sondaı-aq Túrkistan oblysyndaǵy О́gem ózeninde sý elektr stansalary kaskady bar sý qubyryn salý jobasy maquldandy. Jobaǵa salynǵan ınvestısııalardyń jalpy kólemi shamamen 190 mlrd teńgeni quraıdy. Jobanyń maqsaty – Túrkistan oblysynyń 1 mln-ǵa jýyq turǵynyn sapaly aýyzsýmen qamtamasyz etý. Joba sonymen qatar óńirdegi elektr energııasynyń tapshylyǵyn jabýǵa, sanıtarlyq-gıgıenalyq jaǵdaılardy jáne jergilikti halyqtyń jalpy ómir súrý sapasyn jaqsartýǵa baǵyttalǵan.
Bastamalar zamanaýı tehnologııalardy engizýge, joǵary aqy tólenetin jumys oryndaryn qurýǵa jáne el ekonomıkasynyń básekege qabilettiligin arttyrýǵa baǵyttalǵan elimizdiń ónerkásiptik áleýetiniń senimdi damýyn kórsetedi.