UBT bastaldy

Qańtar UBT-syn ótkizýdiń birinshi kúni Ǵylym jáne joǵary bilim mınıstri Saıasat Nurbek Astana qalasyndaǵy tes­tileý ortalyqtarynyń bi­rin­de boldy. Ol UBT-nyń ótý bary­symen tanysyp, bolashaq stý­dentterge sáttilik tiledi.

«Talapkerler ótinish berý barysynda testileý kúnin, ýaqytyn jáne pýnktin ózderi tańdady. Testileýdiń birinshi kúni elimiz boıynsha 2277 adam, onyń ishinde elordada 155 talapker UBT tapsyrady. Eń kóp tańdalatyn beıindi pánder kombınasııasy birneshe jyl qatarynan ózgerissiz qalyp otyr. Talapkerlerdiń 17,5%-y «Matematıka-Fızıka» kombınasııasyn tańdaǵan. Iаǵnı bul – bolashaq ınjenerler, mehanıkter, muǵalimder, tehnıkter men tehnologtar, energetıkter, qurylysshylar. Al 17,3%-y «Bıologııa-Hımııa», 10,3%-y «Matematıka-Infor­matıka» pán­derin tańdady. Olar – erteńgi medısına qyz­met­kerleri men IT mamandary», dedi mınıstr S.Nurbek.

UBT-daǵy pánderdiń sany ózgermedi, ıaǵnı úsheýi mindetti jáne ekeýi tańdaý boıynsha pánder. UBT tapsyrmalar sany – 120. Onyń ishinde «Qazaqstan tarıhynan» 20 tapsyrma, «Oqý saýattylyǵynan» 10 tapsyrma, «Matematıkalyq saýattylyqtan» 10 tapsyrma jáne eki beıindik pán boıynsha 40 tapsyrmadan. Eń joǵary ball – 140.

Testileý ýaqyty – 4 saǵat (240 mınýt). Bul rette erekshe bilim berý qajettilikteri bar balalar úshin usynylatyn qo­symsha 40 mınýt ýaqyt saqta­latynyn aıta ketý kerek.

Esterińizge sala ketsek, qańtardaǵy UBT-ǵa shartty túrde aqyly negizde kúndizgi oqý nysany boıynsha joǵary oqý oryndaryna qabyldanǵan, jazǵy UBT nátıjeleri boıynsha shekti ball jınamaǵandar, shyǵarmashylyq BBT-dan basqa daıyndyq baǵyttaryna, peda­gogıkalyq baǵytqa aqyly ne­giz­de aýysqysy keletinder, sondaı-aq mektep bitiretin tú­lekter joǵary oqý oryndaryna aqyly negizde túsý úshin qaty­sady.