2024 jyl aımaq ekonomıkasy úshin jemisti boldy. Keıingi 13 jylda bolmaǵan rekordtyq ónim alyndy. 1 mln 300 myń tonna astyq bastyrylyp, 409 myń tonna kartop jınaldy. Qaraǵandy qamba toltyrýdan óńirler arasynda tórtinshi satyǵa berik ornyqty. Paıdalanylmaǵan 163 699 gektar jerdiń memleket menshigine qaıtyp, 94 myń tonna óńdelgen ónimniń eksporttalýy da – aıtýly jetistik. О́ńirdegi aýyl sharýashylyǵy ónimi kólemi 455 mlrd teńgege jetti.
Oblys kásiporyndary óndirgen tamaq ónimderiniń kólemi 2,5%-ǵa artyp, 164 mlrd teńge tabysqa shyqqan. Et ónimi – 26,8%, qus eti – 25,1%, un óndirisi 19,9%-ǵa ósti. Qaıta óńdelgen ónim eksporty – 79 myń tonna. Bul kórsetkishtiń barlyǵy 2023 jylǵy kólemnen 17,7%-ǵa artyq. Qýattylyǵy 240 tonna bolatyn elevator jáne qurama jem zaýytyn jańǵyrtý jobalarynyń da júzege asyrylǵanyn qýana habarlaımyz.
«Aýyl amanaty» sheńberinde byltyr 4,4 mlrd teńge somasyna 483 shaǵyn nesıe berildi. Bul nesıelerdiń jartysy mal sharýashylyǵyn damytýǵa, ekinshi bóligi aýyl turǵyndarynyń bıznes-jobasyn qarjylandyrýǵa jumsaldy. 639 jumys orny ashyldy», deıdi oblystyq Aýyl sharýashylyǵy basqarmasynyń basshysy Saıat Mýsın.
«Baǵdarlama boıynsha oblys úshin respýblıkalyq bıýdjetten josparlanǵan 7 mlrd teńgeniń 2,5 mlrd teńgesi sýbsıdııalandy. 885,8 mln teńge somasyna 74 joba maquldanyp, jalpy somasy 676,5 mln teńgege, onyń ishinde 214,5 mln teńge – 36 jobany iske asyrý úshin jeke qosalqy sharýashylyqtarǵa jáne 462 mln teńge – 19 jobany iske asyrýǵa aýyldyq tutyný kooperatıvterine 55 nesıe berildi. Barlyǵy 72 jumys orny quryldy», deıdi basqarma basshysy.
Mundaı qoldaý kórgen irgeli kásiporyndar jetip artylady. Nemis tehnologııasymen aıyna 30 tonna qymyz óndiretin «Saryterek SAQ NS» sehy, «Madı-Agro 7» aýylsharýashylyǵy kooperatıvi ónim kólemin jyl saıyn ulǵaıtyp otyr. «Qarmet» kompanııasyna byltyr 100 myń tonna et ótkizgen olar bıyl da sol mejege jetpekshi. Qazirdiń ózinde 110 mln teńgege et saýdalaǵan.
Investısııanyń da ıgiligi mol. Bıyl 23,1 mlrd teńge tartylǵan. Aýyl sharýashylyǵyna – 20,3 mlrd teńge, tamaq ónimderine – 2,8 mlrd teńge. Josparlanǵan 30 ınvestısııalyq jobaǵa – 23 mlrd teńge, 22 jobaǵa 15 mlrd jumsaldy. Nátıjesinde 816 jumys orny ashylyp, 60 aýyl sharýashylyǵy kooperatıvi quryldy.
«Memlekettik qoldaý sharalary sheńberinde sýbsıdııa retinde 22,8 mlrd teńge somasyna qarajat kózdelgen. Onyń ishinde ósimdik sharýashylyǵy salasynda – 4,8 mlrd teńge, mal sharýashylyǵy salasynda – 6,2 mlrd teńge jáne qarjy quraldaryna 11,8 mlrd teńge ıgerildi. 22,3 mlrd teńge somasyna 2 491 aýyl sharýashylyǵy taýaryn óndirýshilerine sýbsıdııa tólendi. Ol mal men ósimdik sharýashylyǵyna, ınvestısııalyq salymdar kezinde agroónerkásiptik keshen sýbektisi shekken shyǵystardyń bir bóligin óteýge, kredıtteýge jumsaldy. Sondaı-aq tehnologııalyq jabdyq pen aýyl sharýashylyǵy tehnıkasynyń lızıngi kezinde syıaqy mólsherlemesi boıynsha shyǵyndardy azaıtýǵa, qaıta óńdeý kásiporyndarynyń shyǵyndaryn óteýge berildi», deıdi basqarma basshysy.
Keler jyly da aımaq sharýalary tabysty arttyramyz dep otyr. Jalpy ónim óndirý kólemin 601,0 mlrd teńgege deıin, onyń ishinde ósimdik sharýashylyǵy salasyndaǵy yrysty 372,6 mlrd teńgege, mal sharýashylyǵy salasyndaǵy tabysty 228,4 mlrd teńgege jetkizemiz dep josparlap otyr. Et óndirisiniń kólemin – 101 myń tonnaǵa, sútti – 225 myń tonnaǵa, jumyrtqany 718,4 mln-ǵa jetkizbekshi. Dándi daqyldardy 869,3 myń tonnaǵa taıatpaq. Iаǵnı 415,3 myń tonna kartop, 73,7 myń tonna kókónis óndiredi. Bul – negizgi meje. Jer yrysyn berse, rekord jańarýy múmkin.
Qaraǵandy oblysy