Ekonomıkanyń ár salasyn órkendetýge oń yqpalyn tıgizetin salanyń biri – jol. Alaıda Atyraý qalasynan Reseı shekarasyna deıin qatynaıtyn joldy jańǵyrtý áli tolyq aıaqtalar emes. Qurylystyń bastalǵanyna 6 jyldan asty.
Munaıly shahardan shekaraǵa deıin jetkizetin joldyń qurylysy «QazAvtoJol» UK» AQ tapsyrysymen júrgizilip jatyr. Ulttyq kompanııanyń baspasóz qyzmeti byltyr 15 jeltoqsanda atalǵan baǵyttaǵy joldyń qurylysy aıaqtalǵanyn habarlady. Joldyń uzyndyǵy – 272 shaqyrym. Jobany júzege asyrý úshin Eýropalyq qaıta qurý jáne damý bankinen nesıe alynǵan.
«Qaıta jańartý jumystarynan keıin jol úshinshi tehnıkalyq sanattan ekinshi sanatqa aýystyryldy. Eni 3,75 metrlik eki jolaqty qozǵalysy bar jol salyndy. Joba aıasynda 6 kópir, 1 ótkel, 60 sý ótkizgish qubyr men 10 demalys alańy abattandyryldy. Jol boıynda 650 jaryq tiregi ornatylyp, jol paıdalanýshylar úshin qolaıly ári qaýipsiz qozǵalys qamtamasyz etildi», dep habarlaǵan edi kompanııanyń baspasóz qyzmeti.
Halyqaralyq standarttarǵa sáıkes jobany júzege asyrýǵa Qazaqstan, Italııa, Túrkııa men Ázerbaıjan Respýblıkasynyń kompanııalary qatysqan. Jol qurylysyna 650 maman men 450 arnaıy tehnıka tartylǵan. Aqtóbe oblysyndaǵy Muǵaljardan, Mańǵystaý óńirindegi Shetpe kentinen temirjol arqyly 3,4 mln tonna ınertti materıal jetkizilgen. Inertti materıaldar 50 myńǵa jýyq jartylaı vagonmen tasymaldanypty. Bıtýmdy jetkizýge 2,5 myń tehnıka qajet bolǵan.
Alaıda Parlament Májilisiniń depýtaty Serik Erýbaevtyń pikirinshe, Atyraý – Reseı shekarasy baǵytyndaǵy joldyń qurylysy áli tolyq aıaqtalmaǵan. Sol sebepti, ol Premer-mınıstrdiń birinshi orynbasary Roman Sklıardyń atyna depýtattyq saýal joldady.
«Memleket basshysy byltyr Úkimettiń keńeıtilgen otyrysynda elimiz úshin mańyzdy Astana – Balqash – Almaty, Atyraý – Astrahan, Aqtóbe – Qandyaǵash, Taldyqorǵan – О́skemen baǵytyndaǵy joldardyń rekonstrýksııa merzimi uzaqqa sozylǵanyn synǵa alyp, jedel aıaqtaýdy tapsyrǵan edi. Kólik mınıstri M.Qarabaev 23 jeltoqsanda Májiliste ótken Úkimet saǵatynda atalǵan joldardy jóndeý jumystary tolyq aıaqtalyp, qoldanýǵa berilgenin aıtty. Onyń ishinde qurylysy 2018 jyly bastalyp, alty jyl boıy aıaqtalmaı jatqan Atyraý – Astrahan tasjoly da bar. Alaıda Isataı aýdanynda 17 shaqyrymdy quraıtyn Aqqystaý – Tushyqudyq aınalma joly áli bastalmaǵan dep aıtýǵa bolady. Keıbir ýchaskelerde asfalttiń sońǵy qabaty salynbaǵan. H.Erǵalıev aýylynda kópir qurylysy bitpegen. Kólikter áli aınalyp ótip júr. Birinshi, ekinshi jáne úshinshi lot boıynsha 621-753-shaqyrym aralyǵyndaǵy 132 shaqyrymda jyldamdyq shekteýi saǵatyna 60 shaqyrym degen jol belgisi áli alynbaǵan. Bul 277 shaqyrymnyń jartysyna jýyǵy – 132 shaqyrymy tolyq bitpedi degen sóz», deıdi S.Erýbaev.
«QazAvtoJol» UK AQ Atyraý oblystyq fılıaly dırektorynyń orynbasary Azamat Qabdyǵalıevtyń málimetinshe, 621-833-shaqyrymǵa deıingi ýchaskede negizgi qurylys-montaj jumystary aıaqtalǵan. Joldyń bul bóligine asfaltbeton jabyny tóselip, kópir, sý ótkizetin qubyr, torly qorshaý, Isataı aýdanyndaǵy Tushyqudyq jáne Aqystaý aýyldarynyń tusynda jaryqtandyrý tirekteri salynǵan.
«Joba aıasynda 10-ǵa jýyq demalys orny, sanıtarlyq-gıgıenalyq toraptar men kempıngter salynady. H.Erǵalıev aýyly mańyndaǵy Baqsaı ózegi arqyly ótetin kópirdiń qurylysy aıaqtaldy. Endi tosqaýyl jáne qorshaý ornatý jumystaryn aıaqtaý josparlanyp otyr. Isataı kentiniń mańyndaǵy 753-833-shaqyrym aralyǵyndaǵy 80 shaqyrymdyq jol bóligi paıdalanýǵa berý satysynda tur. Bıyl 132 shaqyrymdy qoldanysqa berý josparlandy», deıdi A.Qabdyǵalıev.
Onyń aıtýyna qaraǵanda, bıyl jol boıynda birneshe jumysty atqarý kózdelipti. Bul – jıegin nyǵaıtý, arnaıy belgilerdi ornatý, qurylys júrgizilgen aýmaqtardy rekýltıvasııalaý.
«Barlyq kezeńde atqarylyp jatqan jumystyń sapasy udaıy baqylaýǵa alynǵan. Baqylaýdy merdiger kompanııalar zerthanasy, tehnıkalyq qadaǵalaý qyzmeti men Jol aktıvteri sapasynyń ulttyq ortalyǵy mamandary júrgizip keledi. Atyraýdan Reseıdiń Astrahan oblysymen shekaraǵa deıin qatynaıtyn joldy qaıta jańartý aımaqtyń kólik ınfraqurylymynyń damýyna jol ashyp, eki el arasyndaǵy ekonomıkalyq, iskerlik qarym-qatynasty odan ári nyǵaıtady. Otandyq ekonomıkanyń keń qanat jaıýyna, elimizdiń halyqaralyq saýda baılanysyn jetildirýge de septesedi», dedi A.Qabdyǵalıev.
Shekaraǵa deıingi joldyń jóndelýin ásirese, Isataı jáne Qurmanǵazy aýdanynyń turǵyndary uzaq kútti. Tańatar Dárelulynyń aıtýynsha, kúrdeli jóndeýden soń kóliktiń júrý ýaqyty edeýir qysqarǵan.
Atyraý oblysy