Medal jaýǵan kún

Frıstaıl-mogýldan je­keleı saıysta aldy­na qara túsirmegen Anastasııa Gorodko juptyq tartysta da teńdessiz ekenin pash etti. Fınaldyq báseke elimizdiń qos birdeı sportshysy arasynda órbidi. Aıaýlym Ámirenova kúmispen kúptelse, Anastasııa Gorodko ekinshi altyn medaldi enshimizge baılady. Fınaldyq saıystan keıin áserin bólisken sańlaq komandalas sportshymen tartysqa túskenniń áseri basqasha bolatynyn jetkizdi. «Týrın dodasyna qatysty josparym tolyq oryndaldy. Jeńiske jetemin degen maqsatpen kelgen edim, bári tyńǵylyqty ázirlik pen bapkerlerdiń tynymsyz eńbeginiń nátıjesi. Alda áli de elimizdiń kók týyn jel­birete bergim keledi», dedi Ýnıver­sıadanyń eki dúrkin chempıony.

Kúmis medal oljalaǵan Aıaýlym Ámirenova Anastasııa Gorod­koǵa sál ýaqyt aıyrmasymen utyldy. «Jekeleı saıys­ta 5-satyǵa turaqtap, júlde buıyrmaǵany janyma qatty batty. О́zimdi-ózim ishteı ábden shyńdadym. Juptyq tartysta qalaıda medal enshileý qajet dep sheshtim. Sóıtip, maqsatyma jettim. Degenmen chempıon bolýdy kim qalamasyn. Men de altyn medal enshilesem dep barymdy saldym. Biraq fınalda jahannyń úzdik sportshysy, jerlesim Anastasııa Gorodkoǵa ese jiberdim», dedi Aıaýlym.

Erler arasyndaǵy dodada Anton Bondarev fınaldyq saıys­ta japon úzdigi Kavaokadan asa almady. «Buıyrǵany kúmis medal boldy. Elimizdiń baı­raǵyn kótersem dep kelip edim. Mundaı dúbirli dodaǵa tuńǵysh ret qatysyp otyrmyn. Irikteý kezeńindegi qarsylastar da ońaı emes edi, fınaldyq tartystyń bási tipti joǵary boldy. Kóńilge medeti – elge qur qol qaıt­paı­myn», dedi A.Bondarev.

Ázirge biz sportshylar frıstaıl mogýldan Anastasııa Gorodko enshilegen 2 altyn, Aıaýlym Ámirenova men Anton Bondarev oljalaǵan 2 kúmis, parashańǵydan Denıs Zınov, Roman Qurbanov ıelengen 2 qo­la medal nátıjesimen jalpy esepte 2-satyda tur. Kósh basynda Fransııa sportshylary bolsa, úzdik úshtikti Fınlıandııa sańlaqtary túıindep tur.