Almaty qalasynda kórnekti opera ánshisi, akter, pedagog Ermek Serkebaevtyń eskertkishi ashyldy. Abylaı han dańǵylynyń boıynda, Qurmanǵazy atyndaǵy Qazaq memlekettik akademııalyq halyq aspaptary orkestri ǵımaratynyń aldynda eńse tiktegen eskertkishte qazaq mádenıetiniń óristeýine aıshyqty úles qosqan óner ıesi men onyń súıikti aspaby kúısandyq qosa bederlengen.
Eskertkishtiń ashylý saltanatyna Mádenıet jáne aqparat mınıstri Aıda Balaeva, Almaty qalasynyń ákimi Erbolat Dosaev, ánshiniń aǵasy Murat Serkebaev pen uly Baıǵalı Serkebaev, sondaı-aq shyǵarmashylyq zııaly qaýym ókilderi men qala turǵyndary qatysty. Mınıstr Aıda Balaeva eskertkishtiń ashylýy qazaq halqynyń uly perzentine degen qurmeti ekenin atap ótip, Ermek Serkebaevtyń baı rýhanı murasy ult jadynda máńgi saqtalatynyn aıtty.
– Ermek Serkebaev – sırek kezdesetin talant ıesi, kásibı sheberligi joǵary mýzykant. Ol mıllıondaǵan ónersúıer kórermenniń shynaıy mahabbatyna bólendi. Búgingi qazaq operasyn Ermek Serkebaevsyz elestetý qıyn. Onyń ǵıbratty ǵumyry – mádenıetimizdiń tarıhyndaǵy tutas bir taraý. Kópshilik bilmeýi múmkin, biraq ol qoǵamdyq-saıası ómirde de belsendilik tanytyp, Táýelsizdigimizdiń qalyptasýy men nyǵaıýyna zor úles qosty. Sonymen qatar Ermek Bekmuhameduly daryndy mýzykanttar áýletiniń negizin qalady. Balalary men nemereleri onyń isin laıyqty jalǵastyryp, qazaq ónerin álemniń ár túkpirinde dáriptep jatyr. Bul eskertkish súıikti qalamyzdyń taǵy da bir ásem de áserli nysany ǵana emes, óz ómirin ónerge arnaǵan talaı jastarǵa kórneki úlgi, bıik baǵdar bolaryna senimdimin, – dedi Mádenıet jáne aqparat mınıstri.
Vedomstvo basshysy óz sózinde asqar talant ıesiniń beınesin qoladan somdaǵan músinshiler Aıdos Búrkitbaevqa, Tımýr Ermuhametovke, Aqylbek Ormanbekovke jáne Qýanysh Asylbaıǵa erekshe alǵys bildirdi.
Is-sharaǵa kelgen zııaly qaýym kásibı sheberligi arqyly moıyndalyp, el júregindegi ekinshi ómiri bastalǵan dara darynnyń ómir tynysy men shyǵarmashylyq joly, adamı qasıeti týraly júrekjardy lebizderin jetkizdi.
– Ermek Serkebaev – búkil jandúnıesin shyǵarmashylyqqa arnaǵan adam. Ol óziniń qaıtalanbas talantymen ónerdiń shekarasyn keńitti, aqtyq demi qalǵansha bekzat ónerdiń básin bıik ustady. Ol kisimen talaı sahnada birge óner kórsettik, uzaq saparlarda birge júrdik. Asqaq talanty bir tóbe, kisilik kelbeti óz aldyna bir tóbe keremet jan edi. Artynda ólmeıtin úni men sıqyrly sazy qaldy. Izinen ilesken shákirtteri, onyń óneri arqyly shyǵarmashylyqqa qyzyqqan óskeleń urpaq rýhyna máńgi qurmet kórsetedi dep esepteımin. Bul eskertkish – óner men rýhanııattyń bıiktigin pash etetin máńgilik estelik. Ol – uly tulǵanyń rýhyna kórsetilgen qurmet qana emes, onyń óneri men murasyn keler urpaqqa amanat etýdiń belgisi, – dedi opera ánshisi Álibek Dinishev.
Ermek Serkebaev ult mádenıetiniń, ásirese, klassıkalyq mýzyka óneriniń damýyna úlken úles qosty. Ol ónerdegi jolyn Qurmanǵazy atyndaǵy Almaty memlekettik konservatorııasynda oqı júrip, 1947 jyly Abaı atyndaǵy opera jáne balet teatrynda qoıylǵan A.Jubanov pen L.Hamıdıdiń klassıkalyq týyndysy – «Abaı» operasyndaǵy Abaı partııasyn oryndaýdan bastaǵan. Kameralyq jáne estradalyq ánshi retinde de keńinen tanylǵan onyń repertýarynda qazaqtyń halyq ánderimen qatar, keńes odaǵy jáne dúnıe júzi kompozıtorlarynyń tańdaýly týyndylary keńinen oryn aldy. Ol kóptegen halyqaralyq konkýrs pen álemdik festıvalǵa qatysyp, jeńimpaz atandy. Qazaqtyń án ónerin Eýropa men Azııanyń birqatar memleketinde jáne AQSh-ta ótken qazaq mádenıetiniń kúnderinde keńinen nasıhattady.
Álemdik klassıkalyq ónerdiń dara tulǵasy Ermek Bekmuhameduly 2013 jyldyń 16 qarashasynda 88 jasqa qaraǵan shaǵynda dúnıeden ozǵan edi.
ALMATY