Bul vırýs jaqynda shetelden oralǵan 22 jastaǵy el turǵynynan anyqtaldy, dep habarlaıdy Egemen.kz.
Ázerbaıjannyń Densaýlyq saqtaý mınıstrliginiń málimetinshe, 22 jastaǵy azamat 2-11 qańtar aralyǵynda shetelde saparda bolǵan. Elge oralǵannan keıin birneshe kún ótken soń ol álsizdikke, dene qyzýynyń kóterilýine jáne bulshyqetterdiń aýyrsynýyna shaǵymdanyp, Bakýdegi emhanaǵa barǵan.
Infeksıonıst dáriger naýqastyń belgilerine qarap maımyl sheshegin juqtyrǵanyna kúdiktengen. Anamnez jınaý nátıjesinde onyń shetelde bolǵany jáne sapar kezinde bórtpe paıda bolǵan adammen jaqyn baılanys jasaǵany anyqtalǵan.
«Naýqastyń belgileri epıdemıologııalyq baılanyspen birge zerthanalyq tekserýden ótýge negiz boldy. Bórtpeden alynǵan jaǵyndynyń PTR synamasy maımyl sheshegi vırýsyna oń nátıjeni kórsetti. Naýqas qazir aýrýhanaǵa jatqyzylyp, stasıonarlyq em qabyldap jatyr», delingen habarlamada.
Naýqaspen qarym-qatynasta bolǵan otbasy múshelerinde aýrý belgileri anyqtalmaǵandyqtan, olar aýmaqtyq ambýlatorııalyq-emhanalyq mekeme men sanıtarlyq-epıdemıologııalyq qyzmet qyzmetkerlerimen úıdegi baqylaýǵa alyndy. Olarǵa profılaktıkalyq em taǵaıyndalyp, qajetti dári-dármekpen qamtamasyz etilgen.