17 qańtar kúni tańerteń 21 jastaǵy jigit tórt týysyn pyshaqtaǵan. Oqıǵa ornynda 27 jastaǵy aǵasy jan tapsyryp, úsh adam aýrýhanaǵa jetkizilgen edi, dep jazady Egemen.kz.
Astana qalalyq polısııa basqarmasynyń málimetinshe, jas jigit týystaryna onlaın oıynǵa tyıym salyp, telefonyn tartyp alǵannan keıin pyshaq salǵan.
Qazir 1964, 1974 jyly týǵan eki áıel № 1 kópsalaly qalalyq aýrýhanada em alyp jatyr. Dárigerler olardyń jalpy jaǵdaıy ortasha turaqty ekenin aıtyp otyr.
«Tekserý nátıjesinde 1964 jylǵy áıeldiń denesiniń ártúrli bólikterinde birneshe jerden kesilgen jaralar anyqtaldy, sonymen qatar sol jaqtaǵy qabyrǵasy synǵan. Aýrýhanaǵa aýyr jaǵdaıda jatqyzyldy jáne operasııa jasaldy, qazir pasıent qarqyndy terapııa bólmesinde jatyr. Sondaı-aq 1974 jyly týǵan áıeldiń denesi pyshaqpen ártúrli jerden kesilgen, denesi kógergen, bas jaraqatyn alǵan jáne oń jaq qabyrǵasy synǵan. Jalpy jaǵdaıy ortasha, turaqty», delingen Densaýlyq saqtaý basqarmasy taratqan habarlamada.
Taǵy bir jaraqat alǵan 18 jastaǵy naýqas hırýrgııa bólimine túsken. Dárigerlerdiń aıtýynsha, onyń da densaýlyq jaǵdaıy ortasha turaqty.