Memleket basshysy Joldaýda jol salasy máselelerine toqtalyp, bul baǵytta ınnovasııalyq tásilderdi engizýdiń mańyzdy ekenin atap ótti. Jaqynda Kólik mınıstrligi Jol-qurylys materıaldary men tehnologııalarynyń biryńǵaı bazasynyń qanatqaqty nusqasyn iske qosty. Platforma joldardy jobalaý men salý tásilderin jańǵyrtýǵa baǵyttalǵan.
Joldardy salý men jóndeýge qajetti aqparattar bir jerde toptasady. Bazada karer, asfaltbeton zaýyttary, jol tehnıkasy men materıaldary týraly derekterdi tabýǵa bolady. Materıaldardyń sapasy men olardyń qoldanylý salasy týraly málimet te kórsetilgen. Platforma iri kompanııalar úshin de, shaǵyn jáne orta bıznes úshin de qoljetimdi. Bazanyń basty artyqshylyǵy – aqparatqa qoljetkizý jeńil. Bul óz kezeginde jobalardyń oryndalýyn tezdetýge jáne olardyń sapasyn arttyrýǵa kómektesedi.
«QazjolǴZI» AQ vıse-prezıdenti Erik Ámirbaevtyń aıtýynsha, bolashaqta biryńǵaı bazany paıdalaný mindetti bolady. Bul aqparatty retteýge kómektesedi jáne úderisterdi ashyq etedi.
«Platformada usynylǵan barlyq derekti ınstıtýt mamandary tekseredi. Endi naryqqa qatysýshylar aqparat alý úshin deldaldarǵa júginýdiń qajeti joq. Ol tikeleı platformada qoljetimdi. Bul alaıaqtyq táýekelderin azaıtýǵa jáne naryqtaǵy adaldyqty arttyrýǵa múmkindik beredi. Naryqtyń keıbir qatysýshylary eski ádistermen jumys isteýge daǵdylanǵan, sondyqtan jańa tehnologııalarǵa saqtyqpen qaraıdy. Biraq tájirıbe kórsetkendeı, ıkemdilik pen qazirgi jaǵdaıǵa beıimdelýge daıyn bolý mańyzdy ári sheshýshi ról atqarady. Bizdiń quralmen tanysqannan keıin adal kásipkerde eshqandaı alańdaýshylyq bolmaıdy», dedi Erik Ámirbaev.
Platforma jumysynyń birinshi jylynda «QazjolǴZI» ázirleýshileri keri baılanysqa shyǵyp, nátıjelerdi taldaýdy josparlap otyr. Bul júıeni jaqsartýǵa jáne ony salanyń barlyq qatysýshysy úshin yńǵaıly ári tıimdi etýge kómektesedi.
Jol salasyndaǵy ınnovasııany ilgeriletýdegi taǵy bir tetik – «Kópirlerdi paıdalanýdy basqarý júıesiniń» jasalýy. Otandyq ǵalymdar kópir qurylystary ekspress-monıtorınginiń biregeı mobıldik júıelerin engize otyryp, ınjenerlik baqylaý salasyn damyta túsýge nıetti. Jańa tehnologııa kópirlerdi dıagnostıkalaýdyń tıimdiligin, sapasyn jáne jyldamdyǵyn arttyrýda mańyzdy qural bolmaq.
«Qazir kópir qurylysyn zertteý dalalyq jumystardy da, derekterdi kameraldyq óńdeýdi de qamtıdy. Bul jıyntyǵynda bir aptaǵa jýyq ýaqytty alady. Alaıda mobıldi monıtorıng júıelerin paıdalanar bolsaq, bul ýaqyt eki ese qysqarady», deıdi «QazjolǴZI» vıse-prezıdenti Nurlan Smaılov.
Ekspress-monıtorıng júıesi syzyqtyq qozǵalys, deformasııa, dirildi údetý, akýstıkalyq emıssııa belsendiligi, sondaı-aq kópir qurylystarynyń túıisken bólikterindegi qysymdy ólsheýge qabiletti zamanaýı joǵary tehnologııalyq datchıkter keshenimen jabdyqtalǵan. «Jańa tehnologııanyń ereksheligi – ólsheý jumystary tipti kópir arqyly kólik qozǵalysy kezinde de júrgizilýi múmkin. Bul óte mańyzdy. О́ıtkeni qurylymdyq elementterdiń kóptegen aqaýy júkteme kezinde ǵana baıqalady», deıdi «QazjolǴZI» Kópir qurylysy basqarmasynyń basshysy Qaısar Shalqar.
Monıtorıngtiń mobıldi júıeleri engizilgen soń, yqtımal problemalar jedel anyqtalyp, olardy joıý úshin sharalar qabyldanady. Bul saıyp kelgende kópir qurylysynyń qaýipsizdigi men senimdiligin arttyrady. Mamandardyń aıtýynsha, ekspress-monıtorıng júıesiniń kómegimen alynatyn derekter bolashaqta ınstıtýt ázirlegen kópirlerdi paıdalanýdy basqarý júıesine avtomatty túrde tartylady.
«SÝEM elimizde bar kópir qurylysynyń 3D-modelderin jáne árbir nysan derekteriniń keń jıyntyǵyn saqtaıdy. Sońǵy zertteý týraly málimet, geodezııalyq zertteý nátıjeleri, pasporttyq derek, jobalaý-smetalyq qujattama, júrgizilgen jóndeý boıynsha atqarýshylyq qujattama jáne basqa da keshendi tásil árbir kópirdiń jaı-kúıi men paıdalaný tarıhyn jan-jaqty túsinýdi qamtamasyz etedi», deıdi ınstıtýttyń Syrtqy kommýnıkasııalar qyzmetiniń basshysy Adına Aınaeva.