Daǵdarystyń aldyn alý qadamy

Aqtóbede Premer-Mınıstrdiń birinshi orynbasary Baqytjan Saǵyntaevtyń tóraǵalyǵymen otandyq taýar óndirýshilerdi qoldaý men qazaqstandyq úlesti damytýǵa arnalǵan keńes ótti. Keńeske ortalyq mem­le­ket­­tik organdar jáne olardyń aý­­maq­tyq bólimsheleri, ulttyq kom­­pa­nııalardyń, jergilikti atqa­rýshy organdardyń, kásip­odaq jáne qoǵamdyq uıym­dar­dyń, qarjy ınstı­týt­tary­nyń, sondaı-aq, bir­qatar ká­sip­oryn­dardyń basshylary qa­tysty. Onda Baqytjan Saǵyntaev álemdik qarjy daǵdarysyna, son­daı-aq, Reseı rýbliniń qunsyz­danýyna baılanysty el ekonomıkasyna yqpalyn azaıtýǵa baǵyttalǵan Úkimet qolǵa alyp jatqan sharalardy áńgime ózegine aınaldyrdy. – Álemdegi saıası jáne eko­no­mıkalyq jaǵdaıǵa baılanysty jergilikti jerdegi júıe quraýshy jáne ulttyq kompanııalarmen jergilikti ákimdik tarapynan qazaqstandyq mazmundy arttyrý jáne óńirlerde áleý­mettik turaqtylyqty saq­taý boıynsha jumystar qolǵa aly­nýda. Elbasy álemdik daǵ­darys pen Reseı rýbliniń qun­syzdanýynyń saldaryn der kezinde sezip, óziniń «Nurly Jol – bolashaqqa bastar jol» atty Qazaqstan halqyna Joldaýynda osy syn-qaterlerden shyǵý joldaryn kórsetti. Osyndaı kúrdeli kezeńde el ekonomıkasy damýynyń jeti basym baǵyttaryn aıqyndap berdi. Bul baǵyttar boıynsha sharalar alynyp, júıeli jumystar jasalýda. Elimizdiń jyldyq bıýdjeti buryn bir tonna munaıdyń baǵasy 80 dollar shamasynda belgilense, keıin 50 dollar baǵamymen naqtylandy. Alaıda, «Nurly Jol» Jańa Ekonomıkalyq Saıasatynda qaralǵan baǵdarlamalardyń barlyǵy da oryndalatyn bolady. Kásipkerlikti damytýǵa da jeńildikter qarastyrylyp, qarjylaı qoldaý kórsetiledi. 2016 jylǵa qaralǵan qarjylaı qoldaýdy 2015 jylǵa bólý jóninde Elbasymen kelisildi. Temirjol tarıfin, elektr qýaty baǵasyn tómendetý baǵytynda qadamdar jasalýda. Jalpy, orta jáne shaǵyn bıznesti qoldaýdyń múmkin bolǵan tetikteri qarastyrylýda. О́ńirlerde salynyp jatqan turǵyn úıler daıyn bolsa, ony Úkimet belgilegen baǵamen satyp alý oılas­tyrylýda. Elimiz boıynsha bes-alty qalada mundaı múmkindikter bar ekeni qazirdiń ózinde belgili bolyp otyr, – dedi Baqytjan Saǵyntaev. Ol sondaı-aq, jumys oryndaryn qysqartpaý, óndiristerdiń yr­ǵaqty jumys isteýin qamtamasyz etý máselelerine de toqtaldy. О́z kezeginde oblys ákimi Ar­hımed Muhambetov baıandamasynda óńirdegi otandyq ónim óndirýshilerdi qoldaý, daǵdarysqa qarsy sharalardy qabyldaý jáne jergilikti quramdy damytý jaıynda baıandady. Osy oraıda, Qazaqstanda satyp alynatyn taýarlar kólemin ulǵaıtý maqsatynda óńirde jańa óndiris oryndary qurylyp, qoldanystaǵylary jańǵyrtylatynyn jetkizdi. О́ńir basshysynyń málimdeýinshe, oblys­ta alǵashqy besjyldyqta údemeli ındýstrııalyq-ınnovasııalyq damý memlekettik baǵdarlamasy aıasynda Indýstrııalandyrý kartasyna jalpy somasy 691,1 mlrd.teńgeni quraıtyn 83 ınvestısııalyq joba engizilip, 11,8 myń jumys orny qurylǵan. 74 kásiporyn ónimderin shyǵaryp, olar qazaqstandyq naryqta suranysqa ıe bolyp otyr. О́ńir basshysy qazaqstandyq quram úlesin arttyrý maqsatynda belsendi jumys jasap otyrǵan keıbir kompanııalardy atap ótti. Qazaqstandyq óndirýshilermen tabysty yntymaqtastyqtyń bir mysaly retinde Dóń ken-baıytý kombınatynyń Aqtóbe metall qurylymdary zaýytymen birlesken jumysyn mysalǵa keltirdi. Sondaı-aq, aqtóbelik ón­di­rýshiler Qazaqstannyń aımaqtary arasynda taýar-ekonomıkalyq yn­tymaqtastyǵyn nyǵaıtý boıynsha maqsatty túrde jumystar júrgizip jatqany atap ótildi. Mysaly, «Aqtóbe metall qurastyrmalary zaýyty» JShS-niń metall buıym­dary, «Stroıdetal» JShS temir-beton buıymdary, «Kók­tas» AQ qurylys tastary men qıyrshyq tastary, «Ekoton Batys» JShS uıashyqty bloktary, «Aqtóbestroıhımmontaj» JShS polıetılen qubyrlary qazaqstandyq naryqta suranysqa ıe. Atyraý jáne Mańǵystaý oblystarynyń munaı kásiporyndary «Aqtóbe munaı jabdyqtary zaýyty» AQ ónimderin paıdalanady. Keńes sońynda qyzmettiń ár túrli baǵyttary boıynsha birqatar memorandýmdarǵa qol qoıyldy. Oblys ákimdigi men ulttyq kompanııalar jáne júıe quraýshy kásiporyndar arasynda jalpy somasy 44,6 mıllıard teńgege jergilikti quramdy qamtamasyz etý boıynsha jeti memorandýmǵa qol qoıyldy. Memorandýmǵa qol qoıǵandar arasynda «Eýrazııa toby» JShS, «QazMunaıGaz» AQ, «Qazaq­mys korporasııasy» JShS, «Qazaq­telekom» AQ, «Qazaqstan temir joly», UK» AQ, «SNPS-Aqtó­bemunaıgaz» AQ, «Voshod Orıel» JShS bar. Budan basqa, jumys oryndaryn jáne jumysshylardyń eńbekaqysyn qysqartýǵa jol bermeýge, sondaı-aq, jumys berýshilerdiń eńbek zańdylyqtaryn saqtaý jónindegi, onyń ishinde, eńbekaqy boıynsha qaryzdardy óteý máseleleri boıynsha jumystaryn jandandyrýǵa baǵyttalǵan áleýmettik damý salasyndaǵy jeti memorandýmǵa qol qoıyldy. Qol qoıýshylar arasynda jalpy alǵanda 23 myńnan astam adam eńbek etetin «Qazhrom» TUK» AQ, «SNPS-Aqtóbemunaıgaz» AQ, «Qazaqoıl Aqtóbe» JShS, «AZHS» AQ, «Transenergo» AQ, «Voshod-Orıel» JShS, «Uly Qabyrǵa» JShS bar. Áleýmettik baǵyttaǵy memo­randýmdarǵa qol qoıý – bul bir rettik aksııa emes, túpki maqsaty aımaqtyń turǵyndarynyń ál-aýqatyn jaqsartý bolyp tabylatyn dáıekti jumystar ekenin atap kórsetý qajet. Jyl basynan beri oblysta óndiristik úderisterdi turaqtandyrý jáne jumysshylardyń eńbek qu­qyq­tary men kepildikterin qamtamasyz etý máseleleri boıynsha ózara yn­tymaqtastyq týraly 62 memo­randýmǵa qol qoıyldy. Keńes jumysyn qorytyndyla­ǵan Premer-Mınıstrdiń birinshi oryn­basary Baqytjan Saǵyntaev «SNPS-Aqtóbemunaıgaz» AQ-tyń Ońtústik Qazaqstan oblysyndaǵy kompanııanyń ónimin paıdalanbaı otyrǵanyn atap ótti. Bul munaı salasy kásiporyndary úshin ónim shyǵaratyn birden-bir kásiporyn ekenin, máselege tereńirek qaraý kerektigin qadap aıtty. Satybaldy SÁÝIRBAI, «Egemen Qazaqstan». Aqtóbe oblysy.