Qasıet daryp, qut qonǵan Áýlıeata topyraǵynan talaı myqty sportshy túlep ushqan. Bir ǵana Turar Rysqulov aýdanynda dúnıe dıdaryn kórgen sańlaqtar jeti birdeı Olımpıada júldesin qorjynǵa túsirgen. Olımpıadanyń eki altyny, eki kúmisi, úsh qola júldesin ıelengen mundaı aýdan elimizdiń eshbir óńirinde joq. Qulan óńirinde týǵan boksshy Ermahan Ybyraıymov, erkin kúres sheberleri Islam Baıramýkov pen Aqjúrek Tańatarov, dzıýdoshy Eldos Smetov el tarıhyna, sport shejiresine esimderin altyn áriptermen jazdy.
О́tken jyly Jambyl oblysy elimiz boıynsha «Úzdik sporttyq óńir» atandy. Bul ataq óńir sportshylarynyń qandaı tolaıym tabysy úshin berildi, jambyldyq saıypqyrandar ulý jylynda nendeı jetistikterimen daralandy, óńir sportynyń órkendeýi baǵytynda sala mamandary qandaı jumys atqardy? Bul saýaldarǵa oblys ákimdigi dene shynyqtyrý jáne sport basqarmasynyń basshysy Ernar Ibraımov jaýap berdi.
«О́tken jyly óńirdiń sport salasyn damytýǵa 15,8 mlrd teńge qarjy qarastyryldy. Osyǵan qarap-aq bılik tarapynan sportshylarǵa barynsha jaǵdaı jasalyp jatqanyn baǵamdaýǵa bolady. Sporttyń qaı túrinen bolsyn ulttyq qurama sapy udaıy jańartylyp otyrýy tıis. Jańa býyn qalyptaspaı, sańlaqtardyń aýyz toltyryp aıtarlyqtaı jeńiske jetýi múmkin emes. Myqty sportshylardy shyǵarý, olarǵa qoldaý kórsetý – mindetimiz. Jalpy alǵanda, oblysta 54 sport mekemesi turaqty, tynymsyz jumys istep keledi. Bul mekemelerde 29872 sportshy bar, 1195 jattyqtyrýshy olardyń talapqa saı jattyǵýy jolynda ter tógip júr. Qazirgi kezde óńirde sporttyń 85 túri qamtylǵan. 885 saıypqyranymyz – túrli deńgeıdegi ulttyq quramanyń múshesi. Oblys sportshylary búginge deıin respýblıkalyq, halyqaralyq deńgeıdegi jarystarda 1797 medal ıelendi. Onyń 658-i altyn, 570-i kúmis, 569-y qola júlde», dedi E.Ibraımov.
Basqarma basshysy keltirgen derekke júginsek, ótken jyly bir sportshy elimizdiń eńbek sińirgen sport sheberi, segiz sportshy halyqaralyq dárejedegi sport sheberi, 84 sportshy sport sheberi normatıvin oryndaǵan. Sondaı-aq úsh bapker elimizdiń «eńbek sińirgen jattyqtyrýshysy» ataǵyna ıe bolǵan.
Jambyl oblysyna «Jyldyń úzdik sporttyq óńiri» ataǵy beker berilgen joq. Mamandar bul tabysty tórtjyldyqtyń basty dodasy sanalatyn Parıj Olımpıadasyndaǵy tarıhı tabyspen baılanystyrady. Olımpııa oıyndarynda dzıýdoshy Eldos Smetov 44 jyl boıy kútken nátıjeni tirkep, kúres túrlerinen táýelsiz elimizdiń tarıhynda qazaq oǵlandary sapynan alǵash bolyp altyn júlde ıelenip, Máskeý Olımpıadasyndaǵy Jaqsylyq Úshkempirovtiń nátıjesin qaıtalady.
«Grek-rım kúresiniń sheberi, qazaq halqynyń dańqty uly Jaqsylyq Úshkempirovtiń Máskeý Olımpıadasyndaǵy erligi jurt jadynan máńgi óshpeıtini anyq. Sońǵy úsh Olımpıadada úsh júlde ıelengen Eldostyń Parıjdegi altyn júldesin jankúıerler 44 jyl kútti. Aqyry saıypqyranymyz el úmitin aqtady. Rıo-de-Janeıro – kúmis, Tokıo – qola, Parıj – altyn!
Paralımpıada oıyndaryna Jambyl oblysynan 4 sportshy qatysyp, Jumaǵalı Nurdáýlet parajúzýden kúmis medalǵa ıe boldy.
8-13 qyrkúıek aralyǵynda Astanada ótken V Dúnıejúzilik kóshpeliler oıyndarynda Jambyl oblysynan 17 sportshy qatysyp, 7 altyn, 7 kúmis, 4 qola, barlyǵy 18 medal ıelendi.
Grek-rım kúresiniń sheberi Erjet Jarylqasynnyń Álem chempıonatynda kúmis júldeger atanýy men Azııa chempıonatynda top jarýy da aıtarlyqtaı jetistik. Bul – jambyldyq sportshylardyń eresekter arasyndaǵy Álem chempıonatyndaǵy tuńǵysh júldesi», deıdi basqarma basshysy.
Rasynda da, ótken jyly jambyldyq sportshylar halyqaralyq dodalarda aýyz toltyryp aıtarlyqtaı tabystarǵa qol jetkizdi. Aıtalyq, dzıýdoshy Nurqanat Serikbaev pen Meıirjan Áshirov áskerıler arasynda álem chempıony atandy. Jastar arasyndaǵy álemdik dodada boksshy Asylhan Kósherbaı kúmis, Ánel Ábdirasilova qola júlde ıelendi. Beksultan Boranbek jambyldyq jastar arasynan shyqqan alǵashqy Álem chempıony retinde esimin tarıhqa jazdy. Budan bólek, eresekter arasyndaǵy jarysta Dıas Moljigitov pen Dýlat Bekbaýov Azııa chempıonatynyń kúmis júldesin moınyna ilse, Áıgerim Sáttibaeva qola júldege qol jetkizdi.
О́ńir sportshylarynyń halyqaralyq dodalarda jasyndaı jarqyraǵan sáti de az emes. Sondaı-aq óńirde buqaralyq sportqa myqtap bet burǵan turǵyndardyń sany jyl sanap artyp kele jatqanyn da aıta ketken jón.
«О́tken jyly oblys halqynyń 41,2 paıyzy turaqty túrde sportpen shuǵyldanýǵa den qoıdy. Osylaısha kórsetkish aldyńǵy jyldarǵa qaraǵanda edáýir artty. Qazir oblys kóleminde 503,3 myń adam buqaralyq sportqa tartylǵan. Aldaǵy ýaqytta bul kórsetkishti kóbeıtý maqsatynda jumys isteıtin bolamyz», dedi basqarma basshysy.
Aıtary joq, ótken jyl jambyldyq jampozdar úshin tolaıym tabystarǵa
toly boldy. Olımpııa oıyndarynyń jalǵyz altyn júldesin jambyldyq sportshy qorjynǵa túsirip, tarıhı jetistikti tirkedi. Bylǵary qolǵap sheberleri de tamasha tabystarǵa qol jetkizdi. Degenmen jambyldyq boksshylardyń 2004 jyldan beri Olımpııa oıyndarynda júlde almaǵanyn da qaperde ustaǵan jón. Endigi maqsat – kelesi Olımpıadada sol olqylyqtyń ornyn toltyrý.
Jambyl oblysy