Senattyń Halyqaralyq qatynastar, qorǵanys jáne qaýipsizdik komıtetinde shekaralyq zastavalardy salý jáne jańǵyrtý máselelerine arnalǵan otyrys ótti. Is-sharaǵa múddeli taraptar, memlekettik organdar, quqyq qorǵaý jáne qarjy qurylymdarynyń ókilderi qatysty.
Senat komıtetiniń tóraǵasy Andreı Lýkın shekara nysandary qurylysynyń kesheýildeý máselesine nazar aýdardy. Onyń aıtýynsha, respýblıkalyq bıýdjetten jyl saıyn qarjy bólingenimen, kóptegen nysandaǵy jumys ne toqtap qalǵan, ne tym baıaý júzege asyp jatyr.
«Biz Soltústik Qazaqstan oblysyndaǵy «Aqkól» shekara bólimshesi sııaqty nysandardyń qurylysy toqtap qalǵanyn óz kózimizben kórdik. Máseleniń sebebin anyqtaý áreketinen eshteńe shyqpady, naqty jaýap ala almadyq. Sonymen qatar mundaı jaǵdaı shamamen 20 nysanda baıqalyp otyr, bul merdigerlerge salmaqty suraq qoıýdy talap etedi», dedi A.Lýkın.
Kólik vıse-mınıstri Sátjan Ablalıev negizgi máseleler qarjylandyrý men sý tasqyny kezindegi qıyndyqtarǵa baılanysty ekenin atap ótti. Onyń aıtýynsha, jumys kestesin buzǵan merdiger uıymdarǵa aıyppul salý týraly eskertý joldanǵan, al 20 nysan qurylysynyń birinshi kezeńin 2025 jyly aıaqtaý josparlanypty.
Otyrys barysynda bıýdjet qarjysyn maqsatty túrde paıdalanýǵa baqylaýdy kúsheıtý máselesi men tapsyrys berýshiler, merdigerler jáne qadaǵalaý organdary arasyndaǵy ózara is-qımyldy jaqsartý jónindegi usynystar talqylandy. Senatorlar qurylys merzimin saqtaý jáne ekinshi kezeńdegi qurylysqa arnalǵan jobalaý-smetalyq qujattamany ázirleý qajettigine erekshe nazar aýdardy. Ekinshi kezeń aıasynda taǵy 30 shekaralyq nysan salý josparlanyp otyr.
Kezdesýge qatysýshylar barlyq taraptyń mindettemelerdi qatań oryndalýy mańyzdy ekenin jáne mundaı aıryqsha jobalardy júzege asyrýda jaýapkershilikti arttyrý qajettigin atap ótti.