*Elimizge halyqaralyq Qaıta qurý jáne Damý banki 21,7 mln. AQSh dollary kóleminde grant bóledi. Investısııalar jáne damý vıse-mınıstri Albert Raýdyń aıtýynsha, jobanyń maqsaty – memlekettik jáne áleýmettik nysandardaǵy energııa tıimdiligin jaqsartý baǵytynda qarjylandyrý júıesin qurý.
*«QazAgro» holdınginiń ınvestısııalyq qorjynynda 477 joba bar. Qurylymnyń baspasóz qyzmeti habarlaǵandaı, atalmysh jobalardyń jalpy quny 309,1 mlrd. teńgeni qurap otyr. Olardyń 365-i paıdalanýǵa berilgen.
*Almaty óńirinde yntymaqtastyq týraly 17 memorandým bekitildi. Oblystyq ákimdiktiń baspasóz qyzmeti málim etkendeı, jalpy somasy 22,6 mlrd. teńge bolǵan bul qujattarda jergilikti qamtýdy damytý, óńirdiń ónerkásip áleýetin arttyrý, óndiristik jaǵdaıdy turaqtandyrý men jumysshylar kepildigi jáne eńbek quqyǵyn saqtaý máseleleri qarastyrylǵan.
*Ońtústik Qazaqstan ÚIID baǵdarlamasyn oryndaýda aldyńǵy qatarda. Premer-Mınıstrdiń birinshi orynbasary Baqytjan Saǵyntaev óńirge jasaǵan jumys sapary barysynda bul aımaqta búginde quny 230 mlrd. teńgelik 135 ınvestısııalyq joba iske asyrylyp jatqanyn, sondaı-aq, elimizdegi qýatty ındýstrııalyq ortalyqtardyń birine aınalyp otyrǵan oblys respýblıka boıynsha aldyńǵy orynda turǵanyn málimdedi.
*Jambyl óńiri bıýdjetiniń 54,2 paıyzy shaǵyn jáne orta bıznestiń úlesinde. Oblystyq ekonomıka jáne bıýdjettik josparlaý basqarmasynyń dereginshe, byltyr aımaqta «Bıznestiń jol kartasy - 2020» baǵdarlamasy aıasynda joba jasaýshylarǵa 12,8 mlrd. teńge kólemindegi memlekettik qoldaý kórsetilgen. Aıta keteıik, óńirdiń kásipkerlik sektory bıýdjetke 35 mlrd. teńgeniń túsýin qamtamasyz etken.
*Shyǵys Qazaqstanda jalǵa beriletin turǵyn úıler qurylysy bastaldy. Kompanııanyń baspasóz qyzmeti atap kórsetkendeı, qazirgi tańda «Qazaqstan ıpotekalyq kompanııasy» AQ óńirlerdi damytýdyń 2020 jylǵa deıingi baǵdarlamasy aıasynda Semeıde 2 kópqabatty úıdiń qurylys jumystaryn qolǵa alǵan. Bul úıler jalpy aýdany 7 611 sharshy metr bolatyn 126 páterge eseptelgen.
*Atyraýdaǵy polıpropılen qap shyǵaratyn zaýyt ónimderi Eýropa naryǵynda. ÚIID baǵdarlamasy aıasynda qurylǵan kásiporyn aıyna 120 tonna polıpropılen satyp alýdy josparlap otyr. Zaýyttyń jobalyq qýaty unǵa, qantqa jáne ózge de ónimderge aıyna 1 mln. dana qap shyǵarýǵa jetedi. Munda 185 adam eńbek etedi.
*Pavlodar oblysynyń Zańǵar aýylynda «Balapan» ortalyǵy ashyldy. Pavlodar aýdanynyń ákimi Nurlan Áýtálipov atalmysh eldi mekende mektepke deıingi bilim berý máselesi sheshimin tapqanyn jetkizdi. Turǵyndardyń ótinishi boıynsha qatarǵa qosylǵan ortalyqtyń arqasynda aýylda 11 jumys orny quryldy.
Habarlar Úkimet, oblystyq ákimdikter saıttary men «QazAqparat» agenttiginiń derekteri boıynsha daıyndaldy.