О́tken jyldyń sońynda óńir basshysy Erbol Qarashókeev 2025 jyly Jambyl oblysynda «Áýlıeata – kitap oqıtyn óńir» jobasy júzege asyrylatynyn habarlap, oǵan óńirdiń barlyq sanatyndaǵy azamaty úles qosatynyn jetkizgen edi. Joba aıasyndaǵy is-sharalar jyl bastalǵan sátten-aq qolǵa alynǵany kóńil qýantyp otyr.
Oblys ákimdiginiń bilim basqarmasy men «Jambyl oblysy Azamattyq Alıansy» zańdy tulǵalar birlestiginiń uıytqy bolýymen «Oı sheberi» zııatkerlik oıyny bastaldy. Is-sharaǵa barlyq aýdan men oblys ortalyǵy Taraz qalasyndaǵy mektepterdiń oqýshylary men olardyń jetekshileri jumyldyryldy. Uıymdastyrýshylardyń aıtýynsha, aýqymdy jobaǵa kitapqumar jastardan quralǵan 90 komanda qatysyp jatyr.
«Jergilikti qalamgerlerdiń shoqtyǵy bıik shyǵarmalaryn jas býynnyń sanasyna sińirý maqsatynda uıymdastyrylǵan zııatkerlik oıyn 6 kezeńdi qamtıdy. Bilim alýshylar Sherhan Murtazanyń «Aı men Aısha», «Qyzyl jebe», «Bir kem dúnıe», Baýyrjan Momyshulynyń «Ushqan uıa» sekildi týyndylaryn, Kúlásh Ahmetovanyń birneshe óleń jınaǵyn oqıdy. Sondaı-aq Jambyl oblysynan shyqqan ózge de aqyn-jazýshylardyń shyǵarmalary qamtylady. Bilim alýshylar oqyǵan kitaptaryna qatysty naqty suraqtarǵa jaýap berip, kórkem shyǵarmalardy oqyǵanyn dáleldeýi kerek», deıdi uıymdastyrýshylar.
Demeýshilerdiń qoldaýymen ótkiziletin ár kezeńniń júlde qory 1,2 mıllıon teńgeni quraıdy. Alǵashqy kezeńde Muhtar Áýezov atyndaǵy mektep-lıseı (Sarysý aýdany), Nyǵmetýlla Kıikbaev atyndaǵy mektep-lıseı (Baızaq aýdany), Muhtar Áýezov atyndaǵy mektep-lıseı (Merki aýdany) komandalary úzdikter qatarynan kórinip, jeńimpaz atandy.
Uıymdastyrýshylar keltirgen derekke sensek, aýqymdy joba jyl boıy jalǵasady. Al demeýshilerdiń qarjylaı qoldaýymen qolǵa alynǵan jobanyń jyldyq júlde qory 18,8 mln teńgeni quraıdy eken.
Taraz