Qart Altaıdyń qoıyn-qonyshy toly jumbaq. Qaıbir jyldary Sarymsaqty jotasynda baspalap bara jatqan barys fototuzaqqa ilinip, kópti tańǵaldyrsa, bul joly Topqaıyń aýyly tusyndaǵy Búrkit shyńynyń sileminde sýretke túsken.
2014 jylǵa deıin Altaıdyń shyńdarynda barystyń bary boljam ǵana edi. Qoıshylar men ańshylardyń «barys kórdik» degen sózine bireý sense, endi birimiz kúmánmen qaraǵanbyz. Sol jyldyń qańtarynda ǵoı, qar barysy Arshaty jaqta qurylǵan fototuzaqqa túsip, sensasııalyq jańalyq bolǵan. Odan keıin san márte dáleldendi. Al Topqaıyńnyń tusynda tuńǵysh ret fotoǵa túsirildi.
3300 metr bıiktikke umsynyp turǵan Búrkit silemine fototuzaq qurý da ońaı sharýa emes. Aq qar, kók muzda túý bıikke shyǵyp, barys baǵyp júrgen ınspektorlardyń eńbegi eren. Olardyń da esimin el bilýi kerek shyǵar, sapardy bastap barǵan Katonqaraǵaı ulttyq parki qaramaǵyndaǵy janýarlardy qorǵaý jáne óndirý bóliminiń bastyǵy Erik Qasymov edi.
– Qystygúni taý bókterine atpen, odan ári jaıaý-jalpy jetip, qurǵan fototuzaqty tekserdik. Bul jumys bir ózimniń qolymnan kelmeıdi. Sondyqtan birge barǵan áriptesterime de myń alǵys. Barsaq, apparatymyz shashylyp jatyr. Sóıtip, álgi qurylǵyny etekke alyp tústik. Shynymdy aıtsam, synǵan qurylǵy jaramsyz bolyp qaldy dep oılaǵanmyn. Sóıte tura jady kartasyn tekserip kórip edim, barystyń birneshe sýreti jarq etti. Eń sońǵy kadrǵa qońyr aıý túsipti, – deıdi Erik Qasymov.
Demek temir sandyqty syndyrǵan da aıý bolyp shyqty. Bul sýret – Altaıdyń áli ashylmaǵan qupııalarynyń biri ǵana. Taý qoınaýynda qanshama tylsym jatqany belgisiz. Biraq tumsa tabıǵatty saqtap, keler urpaqqa jetkizý – Erik syndy tabıǵat janashyrlarynyń paryzy.
Katonqaraǵaı ormanynyń ár butaǵy, ár tasyna deıin bir-bir ańyzdyń shejiresi ispettes. Barystyń bul sýreti de sol shejireniń jańa paraǵy bolmaq.
Shyǵys Qazaqstan oblysy,
Katonqaraǵaı aýdany