Astanada matematıka, fızıka jáne ınformatıka boıynsha 21-halyqaralyq O.Jáýtikov olımpıadasy ótti. Oǵan álemniń 15 elinen 700-ge jýyq oqýshy men 150 tálimger qatysty. Mazmundy is-sharany Oqý-aǵartý mınıstrligi,«Respýblıkalyq fızıka-matematıka mektebi» KeAQ jáne «Daryn» respýblıkalyq ǵylymı-praktıkalyq ortalyǵy uıymdastyrdy.
Atalǵan bilim báıgesi bes kúnge sozyldy. Oǵan qatysýshylar eki týr boıynsha baq synady. Komandalardyń quramy ulttyq pándik olımpıadalardyń nátıjeleri boıynsha anyqtaldy. Tapsyrmalar kúrdeliligi mamandandyrylǵan synyptar baǵdarlamasyna sáıkes keldi. Bul halyqaralyq qazylar alqasymen qurastyrylǵan. Qazylar alqasynyń tóraǵasy – akademık, Eńbek Eri Asqar Jumadildaev.
«Respýblıkalyq fızıka-matematıka mektebi» basqarma tóraǵasynyń birinshi orynbasary Almas Kúnǵojınniń aıtýynsha, buǵan deıin bul baıqaý Almatyda ótip kelgen. Elordada alǵash ótip jatyr.
«Bıyl bul olımpıada 21-ret ótýde. Sondyqtan onyń mańyzy úlken. Oǵan 90-nan astam komanda qatysyp otyr. Máselen, ár komanda boıynsha matematıkadan – 3, fızıkadan – 2 jáne ınformatıkadan 2 oqýshy baq synady. Sondaı-aq komandalar bir mektepten bolýy kerek. Jetkinshekter suraqtarǵa ózderi qalaǵan tilde jaýap beredi. Jeńimpazdarǵa elimizge belgili ýnıversıtetterden grant usynamyz», dedi A. Kúnǵojın.
Baıqaýǵa 15 elden alystan at arytyp jetken oqýshylardyń olqysy joq. Bári bilimdi. Mysaly, Almaty qalasynan kelgen Mıras Bazarbaı bilim básekesine ekinshi ret qatysyp otyr.
«Bul olımpıada ózime erekshe unaıdy. Degenmen qıyndyǵy da bar. Biraq men úshin jarystyń nátıjesi mańyzdy emes. Halyqaralyq deńgeıdegi is-sharaǵa qatysýdyń ózi – jaqsy jetistik. Bolashaqta elimizdegi úzdik ýnıversıtetterdiń birine oqýǵa túsip, týǵan jerime qyzmet istesem deımin», dedi ol.
Sonymen, olımpıada qorytyndysy boıynsha 69 oqýshy altyn medalǵa ıe bolsa, kúmis medaldy 100 qatysýshy ıelendi. Al qola medal 150 jetkinshekke buıyrdy. Bizdiń oqýshylarymyzdyń arasynda 21 óren jeńis tuǵyrynan kórinse, 33 oqýshy ekinshi orynǵa qol jetkizdi. Úshinshi oryndy 63 oqýshy aldy. Qysqasy, el qorjynyna ozat órender bas-aıaǵy 117 medal olja saldy. Jeńimpazdardyń bári baǵaly syılyqtarmen marapattaldy.
Dıdar ASYLHAN,
Ahmet Iаsaýı atyndaǵy halyqaralyq qazaq-túrik ýnıversıtetiniń stýdenti