«Adamnyń jan dúnıesin aqtarý úshin oǵan án aıtqyzý kerek», depti Nazym Hıkmet. Shynynda, shyn óner – tazalyqtyń sımvoly. Aqyn sóziniń arǵy jaǵynda sol ónerdiń qudireti, oǵan bet burǵan adamnyń kirshiksiz nıeti jatyr desek jarasar. Al osy ónerge bet burǵan jas urpaqtyń jetistigin atap, oǵan ortaq bolý, iltıpat bildirý de jaqsylyq nyshany.
Sonyń bir dálelindeı Astana qalasyndaǵy №2 óner mektebiniń muǵalimderi men oqýshylary árkez óner bıiginen kórinip keledi. Olar taıaýda ǵana Túrkııa memleketiniń Kemer qalasynda teatr óneri, estradalyq án aıtý nomınasııalary boıynsha ótken «International art festival» atty halyqaralyq balalar baıqaý-festıvaline qatysyp, Reseı, Belarýs, Makedonııa memleketterinen jınalǵan 400 úmitkerdiń arasynan top jaryp júldeli orynnan kórinipti.
Mysaly, G.Qaıyrbekova jetekshilik etetin «О́nerli órender» balalar teatry «Arystan patsha» ertegisin kórsetip, birinshi oryn alypty. Ertegidegi rólderdi kelistirip sahnaǵa shyǵarǵan Arýjan Qyzyr, Ekpin Ernar, Jarylqasyn Azamat, Dana Nurlanqyzy kórermenderdiń kózaıymyna aınalypty. Al estradalyq vokaldan 5-7 jastaǵylar arasynda ótken baıqaýda A.Tynybaeva, D.Qasymbek úshinshi, birinshi oryndy, al N.Kenjebekqyzy bas júldeni ıelenipti. «Aınalaıyn» balalar qory ekinshi orynǵa qol jetkizipti.
Bul mekteptiń «Aınalaıyn» balalar hory 2010 jyly Fransııada ótip, alty memleket ókilderi qatysqan festıvalde birinshi oryndy ıelense, odan keıin Túrkııanyń Bartın qalasynda ótken oqýshylardyń óner jarysynda bári derlik laýreat atanyp qaıtypty. 2013 jyly «Qýyrshaq» teatry oqýshylary Túrkııanyń Bıýıýk qalasynda ótken halyqaralyq festıval júldesin alyp, abyroımen Otanymyzǵa oralypty.
«Bizdiń jas talanttarymyz ulttyq bıden, balalarǵa arnalǵan ertegi teatryndaǵy qoıylymdardan, ult aspaptaryna arnalǵan nomınasııalardan aldyńǵy orynnan kórinip, árkez birinshi, ekinshi júldeni ıelenip keledi», deıdi mektep dırektory Gúlmıra Jangeldi.
Súleımen MÁMET,
«Egemen Qazaqstan».