«Qazgıdromet» arktıkalyq sýyq aǵyndary Qazaqstan aýmaǵyna enýine baılanysty aıazdyń beti aldaǵy eki kúnde qaıtpaıtynyn málimdedi, dep jazady Egemen.kz.
Sondyqtan aıazdy kúni terini zaqymdap almas úshin TJD mamandary usynǵan myna qarapaıym erejelerdi saqtaý kerek:
Denede bos turatyn jyly kıim kııý; Aıaq kıimniń de qalyń ári jyly bolǵanyna jete den qoıý kerek; Aıazǵa qolǵap, moıynoraǵysh, bas kıimsiz shyqpaý shart; Deneniń ashyq bólikterin metall buıymdarǵa janasýdan saqtaý; Eger deneniń bir bóligin úsik shalsa, onyń qaıta tońbaýyna mán berý qajet. Olaı bolmasa teri odan saıyn zaqymdanyp kúrdeliń em-shara jasaýǵa týra keledi. Aıaq-qol tońǵanda lezde jaqyn mańdaǵy jyly orynǵa (dúken, kafe) tezirek kirý kerek. Aıazdy kúni jel, boran soqsa terini qorǵaýǵa eki ese mán berińiz. Mundaı aýa raıy kezinde deneni úsik shalý qaýpi áldeqaıda arta túsedi.Azamattar úsik shalǵanda alǵashqy kómek kórsetý sharalaryn da bilgeni abzal.
Eń aldymen, úsik shalý belgileri bar naýqasty jyly jerge jetkizip, aıaq kıim, shulyq jáne qolǵabyn sheshý kerek. Dereý jedel járdem shaqyryp, deneni I dárejeli úsik shalsa úsigen teri qabatyn qyzarǵansha jyly alaqanmen jylytyp, ýqalaý qajet. Jylytý kezinde jún matany paıdalaný tıimdi bolmaq. Demniń jylýymen de jylytyp, sońynan maqta-dákemen tańady. Zardap shekken adamǵa ystyq as, ystyq shaı berýge bolady.
Al naýqasty jylytý maqsatynda ishimdikter berýge, úsken teri aýmaqtaryn ıntensıvti túrde qarmen, maımen, spırtti eritindilerimen ýqalaýǵa múldem bolmaıdy. Naýqasty jylytý maqsatynda laýlap turǵan ashyq otty paıdalanýǵa tyıym salynady. II-IV dárejeli úsik shalǵanda tez jylytý, massaj nemese ýqalaý jasaýdyń qajeti joq. Zaqymdalǵan jerge jylý shyǵarmaıtyn dáke tańý qajet (qabattalǵan mata, qalyń maqta qabaty, taǵy da mata, ústinen kleenka nemese rezeńke mata). Bul áreketterdi jedel járdem kóligi jetkenshe jasaýǵa bolady. Bastysy medısınalyq kómekti erterek shaqyrýǵa nazar aýdarý qajet.