ASTANA. 5 aqpan. Qazaqtyń tuńǵysh mýltıplıkatory, kórnekti rejısser Qaıdarov Ámen Ábjanuly 92 jasqa qaraǵan shaǵynda qaıtys boldy. Bul týraly «Qazaqstan» telearnasy habarlady.
Kınorejısser, sýretshi, QazKSR-iniń eńbek sińirgen óner qaıratkeri Ámen Qaıdarov 1923 jyly Qaraǵandy oblysy Nura aýdanynda týǵan. 1951 jyly Almaty sýretshiler ýchılıshesin bitirgen soń «Qazaqstan áıelderi», «Ara» jýrnaldarynyń redaksııalarynda qyzmet etken. 1958-1965 jyldary aralyǵynda Máskeýdegi memlekettik kınematografııa ınstıtýtynyń kórkemsýret fakýltetinde oqyǵan. 1965 jyldan «Qazaqfılm» kınostýdııasynda jumys istedi.
Ol – Qazaqstandaǵy mýltıplıkasııalyq janrdyń irgesin qalaýshylardyń biri. 1967 jyly Qaıdarovtyń salǵan sýreti boıynsha halyq ertegisi negizinde elimizde tuńǵysh ret túrli-tústi «Qarlyǵashtyń quıryǵy nege aıyr?» atty mýltıplıkasııalyq fılm jasaldy. Bul týyndy Lenıngrad (qazirgi Sankt-Peterbýrg) qalasynda ótken Búkilodaqtyq kınofestıvalda (1968), Nıý-Iork qalasynda ótken Halyqaralyq mýltıplıkasııalyq fılmder festıvalinde júlde aldy. Sondaı-aq, Qaıdarov «Quıyrshyq», «Janar», «Kún sáýlesinen paıda bolǵan kójek» atty mýltıplıkasııalyq fılmderdi jasaǵan. 1980 jyly Qaıdarovqa «Aqsaq qulan», «Qojanasyr – qurylysshy», «Qyryq ótirik» sııaqty mýltıplıkasııalyq fılmder toptamasy úshin QazKSR Memlekettik syılyǵy berildi. «Qurmet belgisi», «Parasat» ordenderimen jáne birqatar medaldarmen marapattalǵan.
Joldybaı Bazar.
Derek, sýret: «Qazaqstan» telearnasy.