Bul saıys burynǵy jarystan ózgerek. О́ıtkeni elimizde alǵash ret oqýshylar arasynda respýblıkalyq «AI Olymp» atty jasandy ıntellekt olımpıadasy uıymdastyrylmaq.
Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev, Oqý-aǵartý mınıstri Ǵanı Beısembaev jáne Sporttyq baǵdarlamalaý federasııasynyń prezıdenti Baǵdat Mýsın yntymaqtastyq týraly memorandýmǵa qol qoıdy. Qujattaǵy basty jańalyq – «AI Olymp» bilimpazdar básekesi.
Atalǵan olımpıada jasandy ıntellekt jáne baǵdarlamalaý, matematıka, derekterdi taldaý syndy taqyryptarǵa qyzyǵýshylyq tanytatyn talantty oqýshylardy anyqtap, olardy qoldaýǵa, sondaı-aq dara daryndardy halyqaralyq jasandy ıntellekt olımpıadasyna daıyndaýǵa baǵyttalǵan.
«Bul saıysty biz «Generative Nation» bastamasy aıasynda uıymdastyryp otyrmyz. Jas ónertapqyshtardy qoldaý ári olardyń ıdeıalaryn iske asyrý – bizdiń mindetimiz», dedi Sıfrlyq damý, ınnovasııalar jáne aeroǵarysh ónerkásibi mınıstri Jaslan Madıev.
Jıyn barysynda Oqý-aǵartý mınıstri Ǵanı Beısembaev «AI Olymp» saıysyn ótkizý – daryndy oqýshylarymyzdyń áleýetin ashýǵa jáne joǵary bilikti mamandardy daıyndaýǵa strategııalyq qadam ekenin atap ótti.
Aıta keteıik, olımpıada kóktem aıynda ótedi. Eldiń túkpir-túkpirinen jınalǵan oqýshylar eń áýeli baǵdarlamalaý, matematıka jáne mashınalyq oqytý tapsyrmalaryn sheshetin onlaın irikteý kezeńine qatysady. Sodan soń eń úzdik 40 qatysýshy mashınalyq oqytý algorıtmderi, derekterdi taldaý jáne jasandy ıntellektige qatysty praktıkalyq tapsyrmalardy sheshetin fınaldyq kezeńge shaqyrylady. Kil myqtylardan iriktelgen eń úzdik oqýshylar ulttyq quramanyń atynan Qytaı Halyq Respýblıkasynyń Beıjiń qalasynda ótetin halyqaralyq jasandy ıntellekt olımpıadasyna (IOAI) joldama alady.
Sporttyq baǵdarlamalaý federasııasynyń prezıdenti Baǵdat Mýsınniń aıtýynsha, IOAI Halyqaralyq olımpıadasy bıyl 2-9 tamyz aralyǵynda ótedi.