9 mamyr – Uly Jeńis kúni. Úlken-kishi, nemere-shóbere – bárimizdiń júregimizdi tebirentetin erekshe kún.
Atam Nurken Eshojın 1925 jyly týǵan. Qaraǵandy oblysy Nura aýdandyq áskerı komıssarıatynyń shaqyrtýymen, 1943 jyly 30 qańtarda bizdiń úıden, meniń ájemniń, ıaǵnı jeńgesiniń qolynan áskerge alynyp, soǵysqa ketedi. Lenıngrad jáne Belarýs maıdandarynda 219 polktiń atqysh-mınometshisi, keıin zenıtshisi bolady. Odan soń 312 polkte vzvod komandıriniń orynbasary, ıaǵnı serjant dárejesinde soǵysady.
Soǵystan 1948 jyly aman-esen Qorǵaljynǵa qaıta oralyp, úılenedi. Bala súıip, soǵys zardabynan jan-jaqqa tarap ketken týystaryn jınaıdy, qanatynyń astyna alyp, tárbıeleıdi. Beıbit ómirde úlgi bolatyndaı ómir súrdi. Ásirese, tyń kóterý kezeńinde, sharýashylyqtyń bas agronomy retinde tyń sovhozy qurylǵanda, onyń óndiristik-áleýmettik damýyn qamtamasyz etýge kóp eńbek sińiredi. Kóp jyl aýdannyń tuqym ınspeksııasyn basqaryp, astyq ónimderiniń artýyna eseli úles qosady. 1997 jyly 28 mamyrda 72 jasynda dúnıeden ótti.
Atam bizge soǵysta marapattalǵan ordenderi men medaldaryn, sýretterin, hattaryn kórsetip, qaısysyn qaı jerde alǵanyn, ne úshin bergenin aıtyp otyratyn. Kóp sózi joq atam: «Otan aman, el tynysh bolsyn, sender soǵysty kórmeseńder eken», dep tilek tileıtin. Biz, nemere, shóbereleri atamyz soǵysqa qatysqan batyr, kóptegen marapattary bar dep maqtanatynbyz. Kezinde mekteptegi kezdesýlerge shaqyryp, áńgime aıtqyzatyn. О́skinderdi patrıottyqqa tárbıeleýde úlgi-ónege retinde kórsetiletin.
Bıyl Jeńistiń 70 jyldyǵyna baılanysty reseılik «Podvıg naroda» degen ınternet saıttan atamnyń biz bilmeıtin eren erlikteri týraly oqyp, qatty tebireniste boldyq. Ol kisi kórsetken eren erlikteri úshin «Qyzyl Juldyz», «Uly Otan soǵysy» ordenderimen, 5 medalmen marapattalǵan. Soǵystan keıingi merekelik medaldar óz aldyna. Atamnyń nagradalary men marapatqa usynylǵan qaǵazdaryn oqyp otyryp, qaıran ata, ózińe qandaı umytylmas eskertkish ornatyp ketkensiń dep oıǵa shomamyn. Aýyldan soǵysqa 18 jasynda attanyp, surapyl shaıqastarda aýyr jaraqat alǵanyna qaramastan qaıtadan sapqa turyp, jaýyp turǵan oqtyń astynda, eki kúnde 31 jaraly jaýyngerdi qutqaryp, erlik kórsetkeniń ne degen erjúrektik, qaıtpas qaısarlyq deseńizshi!
Otbasylyq muraǵatta, Qarlyǵash tátede atamnyń marapattary saqtaýly. №58 qyzyl ásker kitapshasyna bas qolbasshynyń jeti marapattaý haty tirkelipti. Erligiń árdaıym esimizde, keleshek urpaqqa úlgi bolyp jadymyzda jańǵyra bermek!
Dımash ESQOJIN.
Qaraǵandy oblysy.