Astanada sanıtarlyq tekseristen ótpegen jáne tańbalaý talaptaryn buzǵan ónimderdi saýda sórelerinen alyp tastaý mindetteldi, dep habarlaıdy Egemen.kz.
KTK telearnasynyń habarlaýynsha, saýda sórelerinen alynǵan ónimder qatarynda «Shaın mýskat» júzimi, «Dýbaı» shokolady, «Doshırak» jyldam daıyndalatyn kespesi, «Belarýs» súti jáne birneshe shaı túri bar.
«Belarýs sútinen maı qyshqylynyń quramy boıynsha sáıkessizdikter anyqtaldy. Reseılik unnyń quramyndaǵy myrysh pen temirdiń mólsheri tómen bolǵan. Qazaqstandyq shaıdan boıaǵysh zattar tabyldy», delingen habarlamada.
Departamenttiń sanıtarlyq-epıdemıologııalyq baqylaý bólimi ótken jyly 450-den astam taýar túrin zerttep, ónimderdiń tehnologııalyq jáne gıgıenalyq talaptarǵa sáıkestigin tekserdi.
«Tańbasy joq ónimder, ásirese azyq-túlik ónimderi, qaýipti sanalady. Sebebi ónim týraly eshqandaı aqparat joq, bul tutynýshyny shatastyrady. Osyǵan baılanysty saýda sýbektilerine ónimdi sórelerden alyp tastaý, jetkizýshige qaıtarý nemese joıý jóninde nusqaý berildi», dep túsindirdi Astana qalasynyń sanıtarlyq-epıdemıologııalyq baqylaý departamentiniń bólim basshysy Qarlyǵash Ábdisheva.