Elimizde jolaýshylarǵa ǵalamtor qoljetimdiligin usynǵan alǵashqy qanatqaqty joba aıasynda №3/4 «Astana-Almaty»» poıyzy elordadan jolǵa shyqty, dep habarlaıdy Egemen.kz
Bul týraly «Jolaýshylar tasymaly» AQ baspasóz qyzmeti málimdedi.
Atalǵan baǵyttaǵy sapar 17 saǵatqa sozylady. Alǵashqy saparda 500 jolaýshy ǵalamtorǵa qosylý múmkindigin qoldandy.
Jolaýshylar jańa qyzmet arqyly WhatsApp-ta beıneqońyraý jasap, YouTube-tan beınerolıkter kórip jáne basqa da tanymal ǵalamtor-servısterdi paıdalandy. Alaıda, torrentter men aǵyndy júkteý saıttaryna kirýge shekteý qoıylǵanyn eskergen jón. Jolaýshylardyń aıtýynsha, uzaq saparlarda ǵalamtordyń qoljetimdiligi jol júrýdi áldeqaıda qolaıly ári qyzyqty etedi.
Poıyzdaǵy ǵalamtor zamanaýı spýtnıktik tehnologııalar arqyly iske qosylǵan. Lokomotıvke ornatylǵan spýtnıktik qurylǵy bir poıyz quramynda turaqty jáne joǵary jyldamdyqty ǵalamtorǵa qoljetimdilikti qamtamasyz etedi.
- Poıyzdarda ǵalamtordy engizý – jolaýshylar tasymalyn damytý jolyndaǵy mańyzdy qadam. Biz saıahattardy zamanaýı talaptarǵa saı uıymdastyryp, aqparat pen baılanysqa qoljetimdilikti tolyq qamtamasyz etýge baǵyttalǵan jumystardy júzege asyrýdamyz. Bul joba jolaýshylarǵa baılanysta qalyp, ári jumys istep, ári demalýǵa múmkindik beredi. Aldaǵy ýaqytta biz osy qyzmetti keńeıtip, aldymen «Talgo» poıyzdarynyń barlyq 15 baǵytyna ǵalamtor engizýdi josparlap otyrmyz, – dep atap ótti «Jolaýshylar tasymaly» AQ Basqarma tóraǵasy Ánýar Ahmetjanov.
Jobany júzege asyrý Sıfrlyq damý, ınnovasııalar jáne aeroǵarysh ónerkásibi mınıstrligi, Kólik mınıstrligi, sondaı-aq, «Jusan Mobile» telekommýnıkasııalyq kompanııasy men Qazaqstandaǵy Eutelsat-OneWeb resmı dıstrıbıýtorynyń birlesken jumysynyń nátıjesinde múmkin boldy.
- QTJ poıyzynda tómen orbıtalyq Eutelsat-OneWeb spýtnıktik tehnologııasyn qoldaný arqyly qanatqaqty jobanyń iske qosylýy – kólikti sıfrlandyrý baǵytyndaǵy mańyzdy qadam. Áriptesterimizben atqarylǵan jumystyń nátıjesinde kúrdeli jaǵdaılarda da jolaýshylarǵa turaqty jáne joǵary jyldamdyqty (50–100 Mb/s) ǵalamtor usyný múmkin boldy. Bul jetistik elimizdiń sıfrlyq damýyna jańa múmkindikter ashyp, qazaqstandyqtardyń saparlaryn burynǵydan da qolaıly etedi, – dedi Sıfrlyq damý, ınnovasııalar jáne aeroǵarysh ónerkásibi mınıstri Jaslan Madıev.
Joba aıasynda bıletterdi tekserýge arnalǵan mobıldi termınaldar, poıyz basshylary úshin beıneregıstratorlar jáne beınebaqylaý júıeleri ornatyldy. Barlyq jazbalar avtomatty túrde bultty derekter qoımasynda saqtalyp, baqylaý men qaýipsizdik deńgeıin joǵarylatýǵa múmkindik beredi.
Sonymen qatar ǵalamtordyń engizilýi meıramhana vagonyndaǵy tólem júıesine ózgeris ákeldi. Endi jolaýshylar tapsyrystaryn jol barysynda POS-termınaldar arqyly tóleı alady.