Almaty polısııa turǵyndardy 102 qyzmetin «anyqtama» retine paıdalanbaýǵa shaqyryp, qońyraý shalý tártibin túsindirdi, dep habarlaıdy Egemen.kz.
Jedel basqarý ortalyǵynyń «102» pýltine kúnine 3 myńǵa jýyq telefon qońyraýy túsedi. Olardy arnaıy oqýdan ótken 14 operator óńdeıdi.
Taldaý kórsetkendeı, qońyraýlardyń 25 % aqparattyq-anyqtamalyq maqsatta eken.
- Tótenshe jaǵdaılar qyzmetterine qońyraý shalý asa qajettilikpen negizdelýi kerek ekenin túsiný mańyzdy. «102» nómirine qońyraý shalǵan kezde qajetti aqparatty anyq jáne durys berip, ne bolǵanyn túsindirý kerek. Osy keńesterdi oryndaý bireýdiń ómirin saqtap qalýǵa jáne jedel qyzmetti qate shaqyrmaýǵa kómektesedi, - dedi qalalyq PD Jedel basqarý ortalyǵynyń basshysy Zýhrab Myrzaǵalı.
Sondaı-aq ortalyq basshysy qońyraýlardy qabyldaý úshin Jedel basqarý ortalyǵy paıdalanatyn jabdyq avtomatty rejımde jumys isteıtinin aıtty.
Árbir qońyraý kezek tártibimen qabyldanady. Kóptegen qala turǵyndary jaýap alý úshin birneshe sekýnd kútkennen keıin telefondy qoıa salady. Olar «102» nómirine qaıta qońyraý shalsa, ózderiniń qońyraýyna birden jaýap beredi dep qatelesedi. Biraq bul jerde baǵdarlamanyń avtomatty ekenin eskerý mańyzdy, adam faktory joq. Siz qońyraýdy úzip, «102» nómirin qaıta tergende, baǵdarlama sizdi kezektiń sońyna qaraı baǵyttaıdy. Sondyqtan qońyraýdy tastaı salmaı, operatordyń jaýabyn kútýdi usynamyz, - dedi Zýhrab Myrzaǵalı.