Almaty qalasynyń qylmystyq ister jónindegi mamandandyrylǵan aýdanaralyq ákimshilik sotynda «Qańtar oqıǵasyna» qatysqandarǵa sot úkimi shyqty. Sot barysynda qylmystarǵa qatysty tolyq derek aıtylyp, aıypty dep tanylǵandardyń aldy 20 jylǵa bas bostandyǵynan aıyryldy.
Ulttyq qaýipsizdik komıteti besinshi departamentiniń burynǵy basshysy Rýslan Ysqaqov alańda mıtıng uıymdastyrýǵa tapsyrma bergeni úshin kináli dep tanylyp, 15 jyl 6 aıǵa sottaldy.
«Dıkıı Arman» laqap atymen tanymal Arman Jumageldıev 20 jyl arqalady. Oǵan birneshe aıyp qatar taǵylǵan. Sonyń ishinde A.Jumageldıev Qańtar oqıǵasy kezinde 24 adamdy urlap áketkeni aıtylǵan.
Almaty máslıhatynyń burynǵy depýtaty, kásipker Qaırat Qudaıbergen sot úkimimen 8 jylǵa bas bostandyǵynan aıyryldy. Este bolsa, 2022 jyldyń sáýir aıynda ol Qańtar oqıǵasy kezinde jappaı tártipsizdik uıymdastyrýǵa qatysty degen kúdikpen ustalǵan edi.
«Sot anyqtaǵandaı, 2016 jyly UQK-nyń 5-departamenti basshysynyń orynbasary Ysqaqov ulttyq qaýipsizdik organdarynyń qoldaýyna kepildik beretinin aıtyp, A.Jumageldıevti seriktestikke kóndirgen. UQK organdarynyń qoldaýyna ıe bolǵan A.Jumageldıev Qazaqstan men shetelderdegi qylmystyq yqpalyn keńeıtý maqsatynda qylmystyq uıym qurýǵa kirisken. Ol burynnan tanys, psıhologııalyq turǵydan turaqty, qylmystyq qýdalaýdan qoryqpaıtyn jáne jaqsy fızıkalyq daıyndyǵy bar adamdardy tartqan. A.Jumageldıevtiń qylmystyq uıymynyń barlyq músheleri, uıymdastyrýshylyq, fýnksıonaldyq jáne aýmaqtyq negizde toptarǵa bólinip, tikeleı oǵan baǵynǵan. 2022 jyly qańtar oqıǵalary kezinde Q.Qudaıbergen «Qazaqstan» qonaqúıinde shtab quryp, oǵan A.Jumageldıevtiń tobyn shaqyrdy. Osylaısha kórsetilgen adamdar, qarýly toptyń jáne olarǵa qosylǵan basqa adamdardyń áreketterin basqarǵan», delingen sot qaýlysynda.
«Jappaı tártipsizdikke qatysty» dep aıyptalǵan bloger Berdah Beketov 7 jylǵa sottaldy. Sotta atalǵan tulǵalardan bólek qyryq adamǵa úkim shyqty. Sottalýshylardyń tergeý abaqtysyna qamalǵan ýaqytyn eseptegende, keıbiriniń jazasy ótelgen bolyp esepteldi.
ALMATY