О́SKEMEN. 5 aqpan. Shyǵys Qazaqstan oblysynda Uly Otan soǵysyna qatysqan 614 ardager jáne 27 918 tyl ardageri turady. Osy oraıda Uly Jeńistiń 70 jyldyq mereıtoıy óńirde keńinen atalyp ótpek. Bul týraly egemen.kz tilshisi habarlady.
Oblys ákiminiń orynbasary Jaqsylyq Omar baspasóz ókilderimen kezdesýde Keńes Odaǵynyń Batyry atanǵan ár besinshi qazaqstandyqtyń Shyǵys óńirinen shyqqanyn jetkizdi.
«Jas urpaqtyń batyr babalarymyzdyń erligi men eńbegin jete bilýi, maqtan tutýy úshin olardyń Shyǵys Qazaqstan oblysynan maıdan dalasyna attanyp, óshpes erlik kórsetkeni jóninde jetkilikti aqparattar jınaqtalǵan saıt ashýdy josparlap otyrmyz. Atalǵan saıtta shyǵysqazaqstandyq Keńes Odaǵynyń Batyrlary týraly jekelegen málimetter, sýretteri, ómir joly, qyzmeti, olardyń qan keship júrip maıdannan jazǵan hattary jáne derekti fılmder men beınebaıandar ornalastyrylatyn bolady», – dedi Jaqsylyq Omar.
Sondaı-aq oblys ákiminiń orynbasary 1 naýryzdan bastap «Jeńiske deıingi jetpis kún: keleshek úshin ótkendi eske alamyz» atty aksııa bastalatynyn atap ótti. Atalǵan aksııa aıasynda ardagerlerge túrli deńgeıde kómek kórsetilip, qoldaý sharalary uıymdastyrylady. Oǵan barlyq óńir turǵyndary qatysa alady.
Aıta keteıik, Uly Otan soǵysynyń múgedekteri men qatysýshylaryna bir rettik materıaldyq kómek, mereıtoılyq medaldar beriledi. Kezekte turǵan oblys ardagerleri aǵymdaǵy jyldyń naýryz aıynan bastap turǵyn úıge qol jetkizedi. Sondaı-aq respýblıkalyq bıýdjetten ár ardagerge bir rettik 100 myń teńge kóleminde syıaqy aýdarylady. Odan ózge oblystyń qalalary men aýdandary da ardagerlerge materıaldyq kómek kórsetedi.
Dýman Anash.
Derek: egemen.kz
Sýret: newskaz.ru.