Elbasy Nursultan Nazarbaev Astana ákimi Ádilbek Jaqsybekovti qabyldady, dep habarlady Prezıdenttiń baspasóz qyzmeti.
Qabyldaý barysynda Á.Jaqsybekov Memleket basshysyna qalanyń áleýmettik-ekonomıkalyq damýy, negizgi memlekettik baǵdarlamalardyń júzege asyrylý jaıy, sondaı-aq, Astananyń aldaǵy qoǵamdyq-saıası jáne mádenı-buqaralyq is-sharalarǵa ázirlik barysy týraly baıandady.
Qazaqstan Prezıdenti elordada aýqymdy jumys atqarý qajet bolatynyn atap aıtty.
– Bıyl Qazaqstan halqy Assambleıasynyń 20 jyldyǵy atap ótiledi. Osyǵan baılanysty Naýryz ben Qazaqstan halqynyń birligi kúnin halqymyzdyń tutastyǵy men kópetnosty qoǵamdaǵy kelisim taqyrybymen oraılastyryp merekelegen jón. Bul jumystardy qazirden bastaý kerek. Taǵy bir mańyzdy tus – EKSPO-2017 halyqaralyq kórme nysandarynyń qurylysy, buǵan da erte qamdaný qajet, – dedi Nursultan Nazarbaev.
Memleket basshysy Astanaǵa aıryqsha mańyz berilgen «Nurly Jol» baǵdarlamasyn júzege asyrý máselelerine arnaıy nazar aýdardy. Atap aıtqanda, osy baǵdarlama aıasynda elordanyń turǵyn úı-kommýnaldyq sharýashylyǵyn jańǵyrtý, ınfraqurylymyn damytý jumystary atqarylatyn bolady.
Qazaqstan Prezıdenti qalanyń ınvestısııalyq tartymdylyǵyn udaıy arttyrý, shaǵyn jáne orta bıznes sýbektilerin ilkimdi qoldaý qajettigine toqtaldy.
Nursultan Nazarbaev áleýmettik salany jaqsartýǵa, adamı kapıtaldy damytýǵa baılanysty mindetterdi oryndaýdy jalǵastyrýdy tapsyrdy.
Sonymen qatar, Memleket basshysy jylý berý maýsymyn kidirissiz ótkizýdiń, elorda tirshiligin sapaly qamtamasyz etýge barlyq qalalyq qyzmetterdiń úılesimdi qatystyrylýynyń mańyzdylyǵyn atap ótti.
Qazaqstan Prezıdenti kezdesý qorytyndysy boıynsha birqatar naqty tapsyrma berdi.