Dúzdje qalasynda (Túrkııa) turatyn Muhammetálı Bozdy óz ortasynda kópshilik jaqsy tanıdy. Nege deseńiz, ana tilinen bólek túrik, saha, arab tilderin erkin meńgergen ol ónerden de quralaqan emes.
Talantty jasóspirim búginde elimizdegi Qoja Ahmet Iаsaýı atyndaǵy Halyqaralyq qazaq-túrik ýnıversıteti túrkologııa fakýltetiniń 1-kýrsynda oqıdy. Tarıhı Otanyna kelip oqýdaǵy maqsaty – óz ata-babasynyń topyraǵyn basý, salt-dástúrin kózben kórip, seziný. Muhammetálı bala kezinen ulttyq dástúrge, óz halqynyń ónerine erekshe qyzyqty. Dombyra, shańqobyz ben barabanda sheber oınap úırendi.
«Mýzykaǵa mektep kezinen qyzyǵa bastadym. Alǵashqy oınap úırengen aspabym baraban boldy. Bala kezimde sahalyq shańqobyz oryndaýshysynyń ónerin kórgennen keıin osy aspapqa qyzyqtym. Biraq ony Túrkııadan tabý qıynǵa soqty. Sóıtip, 2019 jyly shańqobyz satyp alyp, ǵalamtordaǵy beınesabaqtar arqyly óz betimmen úırendim. Keıin dombyrany da meńgerdim. «Turan» tobynyń mýzykanty Jantý Dadabaevtan alǵan keńesterim ónerimdi odan ári jetildirýge kómektesti», deıdi ol.
21 jasynda atajurtyna oqýǵa kelgen Muhammetálı tarıhı mekeniniń janyna jaqyn ekenin birden sezgen. Qazirgi tańda ol bilim alyp júrip, túrki halyqtarynyń mádenıeti men dástúrlerin tereńirek zertteýge, jańa mýzykalyq aspaptardy meńgerýge bel býyp otyr. Bolashaqta túrkolog maman retinde túrki halyqtarynyń mádenı murasyn álemge tanytyp, «Turan» tobymen bir sahnada óner kórsetýdi armandaıdy.
«Ár semestrden keıin úıime qaıtyp, demalysymdy sol jaqta ótkizemin. Atajurtta qalý-qalmaý jóninde naqty sheshim qabyldaǵan joqpyn. Biraq Túrkistanda ózimdi damytýǵa barlyq múmkindik bar. Meni qoldaǵan barsha jaqsy jandarǵa alǵysym sheksiz», dedi Muhametálı.
Túrkııada týyp-ósken Muhammetálıdiń tarıhı Otanyna degen ystyq yqylasy sheksiz ekeni birden baıqalady. Jas darynnyń ár sózi jas urpaqqa ulttyq qundylyqtardy qadirleýge jáne mádenı murany saqtaý jolynda talmaı eńbek etýge úlgi bolary anyq.
Iýnýs О́ZKAN,
Q.A.Iаsaýı ýnıversıtetiniń stýdenti