Úı ishindegi ekeý. Áke men bala.«Eı, jalǵan dúnıe-aı!» dedi jas jigit daýsyn kótere sóılep, áldebir áńgime bastaǵysy kelgen syńaı tanyta.
«Táıt!» dep sańq etti tobylǵy óńdi, qoı kózdi, júzin ájim shımaılaı torlaǵan, saqal-shashy, qalyń qasy áppaq, jasy seksennen molynan asqan qarııa qabaǵyn túksıte. – o nesi eı, qaıdaǵy joqty aıtyp. Bul ómirdi baıansyz, turlaýsyz deseń meıli, biraq myna dúnıeni jalǵan deýge qaqyń joq. Bul Táńirdiń jaratylysy, endeshe, ony jalǵan dep joqqa shyǵarýǵa qalaı aýzyń barady. Qudaı Taǵala jasaǵandy jalǵanǵa shyǵarý – bilimsizdiń isi. Seni de oqydy, toqydy, adam boldy dep júrsem, áli shala ekensiń ǵoı, aqymaqneme».
Es bilgeli beri talaı medreseni taýysqan, kitap ashqan, Tashkent, Ystanbul, Sham, Mysyr asyp bilim alǵan, búginde úlken meshitte qyzmet etetin, jamaǵatty aýzyna qarata ýaǵyz aıtyp, bilimimen talaıdy tamsandyrǵan, jurttan tek maqtaý estip júrgen, sońǵy kezderi aınalasyna shekeden qaraýdy shyǵarǵan, boıynan arakidik bolsa da tákapparlyq derti baıqalatyn jas jigit áke aldynda tómenshiktep qaldy.
Kári súıegi syqyrlaǵan, kókiregi syryldaǵan myna myjyraıǵan qarııanyń syny netken qatty edi.
Talaı ustazdyń aldyn kórip, olardyń synaǵynan eshqashan súrinbegen jas jigit áke tezinen teńselip, eseńgirep, mańdaıy jipsı terledi.
Ekeýara sóz odan ári jalǵaspady. Qarııa ornynan tapjylmady. Sóz bastaýǵa qulyq ta tanytpady. Qabaǵyn jazar syńaıy joq. Jas jigit ákesinen ornynan turyp ketýge ruqsat surap, til qatýǵa batyly jetpeı qozǵala almady. Ákesiniń «táıt» dep bastaǵan álgi biraýyz sózi munyń sandaǵan jyl jınap, túıgen bar ilimin syldyr sýǵa aınaldyryp, mańyzyn tómendetip, salmaqsyzdandyryp jibergendeı. Jigittiń mıynda bir oı qaıtalana berdi: «Uly dala akademıkteri kelmeske ketkeli qashan. Shirkin, solardyń birimen bir pás suhbattas bolǵan adamnyń ne armany bolar eken? Meniń ákem dala akademıkteriniń shet-jaǵasy – sońǵylarynyń kózin kórgen daryndy nemese qatardaǵy shákirtteriniń biri bolar bálkim. Dál solaı bolmaǵannyń ózinde túz danyshpandarymen janasa jarty saǵat birge júrgen shyǵar. Dala abyzdarymen janasyp, az-kem suhbattasqan jan danalyqtyń kem degende úlińgirdeı úzigine ıe bolady desedi ǵoı... Átteń-aı, dala danagóıleriniń júregimiz sezetin, biraq bizge belgisiz, jumbaq bolyp qalǵan dara ilimderi sol kúıinde máńgilikke izin jasyryp, ótken shaq saǵymyna aınalyp, bir juqanasy bolsa da peshenemizge buıyrmaı kete bere me?»
Ilim-bilimi, jıǵan-tergeni ishine syımaı, boıyn aýyrlatyp, mańyzdanyp júrgen jas jigit qańbaqtaı jeńil tartty. Boıynan tákapparlyq derti izim-qaıym joǵaldy. Meshitke kele jatyp oı túıdi: «О́z týǵan topyraǵyńnan, temirqazyq – týǵan jer, týǵan elińnen tapqan ilim, tálimge ne jetedi, shirkin!»