Birligi jarasqan óńir

Forýmda sóz alǵan oblys ákimi Ǵaýez Nurmuhambetov mádenıet pen rýhanı damý elimiz úshin mańyzdy baǵyt­tardyń biri ekenin atap ótti. Ol Prezıdent Qasym-Jomart Toqaevtyń «Birlik pen turaqtylyq bolmaı, saıa­sı jáne ekonomıkalyq re­for­malardy júzege asyrý múmkin emes. Beıbitshilik pen kelisim – memlekettik ıdeologııa ǵana emes, qoǵamdyq ómir men eńbektiń ajyramas bóligi» degen sózin eske saldy.

«Elimizde túrli mádenıet­tiń jalpyulttyq bir­lik­ke ulasqan qos­pasy qa­lyp­tas­qan. Osynyń ózi mem­­leket­shildiktiń eń basty myzǵymas jartasy dep bile­min. Bizdiń oblysymyz – res­pýb­lıkada­ǵy kópetnosty ózara dostyq pen kelisimge toptastyrǵan aımaqtardyń biri. Bul – bizdiń kózimizdiń qarashyǵyn­daı saqtaıtyn baǵa jetpes qundylyǵymyz», dedi Ǵaýez Torsanuly.

Odan ári ákim oblystyq assam­bleıanyń quramynda óńirde iri áleýmettik jobalardy iske asyryp jatqan tabysty kásipkerler bar ekenin atap ótti. Olardyń jarqyn isteri aldymen agrarlyq sektorda jáne basqa da salalarda kórinip júr. Qazir aldymyzda eldiń hal-ahýalyn arttyrýdy kózdegen jańa mindetter tur. Assambleıa músheleri bul isterde óz salalary boıynsha alda bolady degen senim bar.

Sonymen qatar oblys basshysy ótken jyldyń óńir turǵyndary úshin úl­ken sy­naq­qa uryndyrǵan jyl bol­ǵa­nyn eske aldy. Buryn eshqashan bolmaǵan sý tasqyny 3 myńnan asa turǵyn úıdi basyp qaldy. Myńdaǵan adam baspanasyz qaldy. Biraq kóktemniń qara sýyǵynda birde-bir turǵyn qorǵansyz qalǵan joq, bárine de jyly jaı uıymdastyrylyp, bú­kil eldiń kómegimen tabıǵat apatynan qutqaryldy. As­sambleıa úıi de sol kúnder­de kómek qolyn sozýshy volon­terlerdiń shtabyna aınaldy. Osy úıden myńdaǵan tonna qaıyrym­dylyq júgi zar­dap shekkenderge kún­diz-túni taratylyp jatty. Qaıy­­rymdylyq sharalarǵa oblys­taǵy barlyq etnos ókili bir kisideı qatysty. Tasqyn sý qaıtqan soń, japa shekken otba­sylar turǵyn úılermen qam­tamasyz etildi, qalanyń sol­­tústik-shyǵysynda «Bir­lik» atty jańa shaǵyn aýdan paı­da boldy. Onda res­pýblıkanyń kómegimen 700 turǵyn úı salyndy. Myńdaǵan otba­syna ekinshi naryqtan úıler satyp áperildi. Oblys­tyń barlyq aýdanynan qurylǵan mehanıkalyq brıgadalar jóndeýge jaraıtyn úılerdi qalpyna keltirýge atsalysty. Petropavldyń japa shekken aýdandarynan 200 myń tonnadan asa qoqys shyǵaryl­dy. Osynaý jumystyń bárin oblys turǵyndary «bir jeń­nen qol, bir jaǵadan bas shyǵar­ǵan» birlikpen atqardy.

«Barlyq etnos ókilderi de ortaq qıyndyqty eńserýge birtutas qazaqstandyq ekenin bildirip, bir kisideı qatysty. Sonaý qıyn kúnderde oblysqa arnaıy kelgen Memleket basshysy Qasym-Jomart Toqaev ta jerlesterimizdiń tabıǵat apatymen jumyla kúresip jatqanyna rızashylyǵyn bildirgen edi. Mine, osyndaı myzǵymas birligimizdi árqashan saqtasaq,  halyqtyń almaıtyn qama­ly bolmaıdy. Eldegi konfes­sııaaralyq tózimdilikti saqtaý­­dyń da mańyzy zor. Bar­lyq álemdik jáne dástúrli dinder halyqtardy birlikke shaqyrady. Sondyqtan myzǵy­mas birlikke negizdelgen ózara kelisim men beıbit ómir ǵana bizdi bıik tabystarǵa shyǵaratynyn umytpaıyq», dedi ákim.

Forýmda Parlament Se­naty­nyń IV–V shaqyrylym­darynyń depýtaty bolǵan, ekonomıka ǵylymdary­nyń doktory Anatolıı Bash­makov, Petropavl qala­sy Ar­dagerler keńesiniń tóraǵa­sy Jangeldi Ýaqpanov, Zoom-men qosylǵan Pre­zıdent janyndaǵy Mem­le­kettik basqarý akade­mııa­sy­nyń rektory, ekonomıka ǵylymdarynyń kandıdaty Erlan Ábil, Manash Qo­zybaev atyndaǵy Soltústik Qazaqstan ýnıversıtetiniń basqarma tóraǵasy-rektor Erbol Isaqaev, Májilistiń eks-depýtaty, pedagogıka salasynyń ardageri Raı­sa Polıshýk, «Qazaq tili halyq­aralyq qoǵamy» birles­tigi fılıalynyń tóraǵasy, óńirlik assambleıa etnomedıasııa keńesiniń tóraǵa­sy Janat Muhamedjanov sóılep, qoǵamdyq birlik pen ózara kelisimniń mańyzy týraly oılaryn ortaǵa saldy.

Forýmda assambleıanyń Qa­zaq­stan halqy birliginiń altyn medali­men Tatar-bash­­qurt etnomádenı ortaly­ǵy­nyń jetekshisi Naıl Ab­raev, «Alǵys» tósbelgisimen óńir­lik assam­bleıanyń tóraǵasy Kemel Ospa­nov, «Orys, slavıan jáne kazak uıym­dary» assosıasııasynyń belsen­disi Iýlııa Rodıonova marapattaldy.

Soltústik Qazaqstan oblysy