Bıyl Pavlodar oblysyndaǵy egis alqaptary 53 myń gektarǵa ulǵaıady. Egin sharýashylyǵyn qoldaýǵa bıýdjetten 4,1 mlrd teńge sýbsıdııa qarastyrylǵan. Ertis-Baıan óńirinde egin ósirýmen myńnan asa sharýashylyq aınalysady. Olardyń egis alańdary bıyl 1 669,7 myń gektarǵa jetedi degen jospar bar.
Meje tolyq oryndalsa, kólem 2024 jylǵydan 52,9 myń gektarǵa artyq bolady degen boljam bar. Bul egis alqaptaryn ártaraptandyrý nátıjesinde múmkin bolmaqshy.
«Barlyq egis alqabynyń 974,0 myń gektary nemese 94 paıyzy astyq daqyldary bolady. Bıyl maıly daqyldardyń egis tanaby 3 paıyzǵa ósip, 360,9 myń gektarǵa, kartop alqaby 4 paıyzǵa artyp, 25,7 myń gektarǵa jetedi dep kútilip otyr. Al kókónis jáne baqsha daqyldary ótken jyldyń kóleminde – 8,8 myń gektar bolyp qala beredi. Buǵan qosa aýdandarda myqty jem-shóp bazasyn qurý jumystary júrgizilip jatyr. Osyǵan oraı bıyl jem-shóp daqyldarynyń alańyn birden 18,8 myń gektarǵa arttyrý josparlanyp, jalpy sebý aýmaǵy 300 myń gektarǵa jetkiziledi», deıdi oblystyq Aýyl sharýashylyǵy basqarmasy basshysynyń orynbasary Tólegen Kósherbaev.
Aldaǵy egiske 164,4 myń tonna tuqym daıyndalyp qoıǵan. Tuqym boıynsha óńirde másele joq, tipti dándi daqyldar boıynsha onyń kólemi 7,5 myń tonnaǵa kóp.
Egin sharýashylyǵyn qoldaýǵa 2025 jyly jalpy somasy 4,1 mlrd teńge sýbsıdııa qarastyrylǵan. Atap aıtqanda, tuqym sharýashylyǵyn qoldaýǵa – 1 mlrd teńge, mıneraldy tyńaıtqyshtar men pestısıdterdiń qunyn sýbsıdııalaýǵa – 2,7 mlrd teńge, fermerlerge sý jetkizý qyzmetteriniń qunyn sýbsıdııalaýǵa 300 mln teńge bólingeli otyr. Demeý qarajattyń kólemi ótken jylmen salystyrǵanda 5,4 mlrd teńgege kemigenin de atap ótý kerek.
Qazir iri sharýashylyqtar qar toqtatý is-sharalaryna kirise bastaǵan. Taza súri jerde qar jamylǵysynyń bıiktigi 14 sm, al yqtyrmada 15 sm-deı bolady. Qar toqtatýdyń alǵashqy kezeńi 74,4 myń gektarda júrgizilgen.
Kóktemde qurylysy biraz ýaqytqa sozylǵan Ertis-Ýspen sý arnasy iske qosylady dep josparlanǵan. Onyń qurylysy keńes zamanynda qolǵa alynyp, keıin toqtap qalǵan edi. Uzaq jyldar turyp qalýyna baılanysty túbine shóp ósip, salynǵan beton plıtalaryn el-jurt taratyp alyp ketken. 2020 jyly sý qurylysy qaıtadan qolǵa alyndy. Kanal alǵashqy bette 1,4 myń gektar sýarmaly egistikti tirshilik nárimen qamtamasyz etedi. Tehnıkalyq qyzmet kórsetetin Pavlodar aýdanynyń eki sharýashylyǵy oǵan qazirdiń ózinde qosylyp, qajetti tehnıkalyq jaǵdaılar jasalǵan. Ertis-Ýspen kanalynan taǵy 12 fermer sý alýǵa nıetti. Bolashaqta kanal 10 myń gektar jerdi sýarýǵa múmkindik beredi degen jospar bar. Joba boıynsha kanaldyń uzyndyǵy – 13 shaqyrym. Sharýashylyqtar onyń kómegimen qosymsha 500 myń tonna aýylsharýashylyq daqyldaryn ósire alady.
Qazirgi ýaqytta óńir aýmaǵynda 171 myń gektar sýarylatyn jer bar. Is júzinde bul aýmaqtyń tek 72 myń gektary ǵana sýarylady. Keleshekte oblysta jalpy kólemi 300 myń gektardy jerdi sýarmaly alqapqa aınaldyrý jospary tur.
Pavlodar oblysy