KSRO jáne Qazaqstannyń halyq ártisi Asanáli Áshimov Qyzdar ýnıversıtetinde qonaqta bolyp, stýdent jastarmen kezdesti. «Qyz Jibekter» ortasynan tabylǵan tanymal aktermen kezdesý atalmysh oqý ornynyń analarǵa arnalǵan «Aqtumar» murajaıyn aralaýdan jáne «Qazaqtyń Asanálisi» atty arnaıy uıymdastyrylǵan foto jáne kitap kórmesinen bastaý aldy.
Áıgili akter shyǵarmashyl jastar kóp jınalǵan kezdesý barysynda jastarǵa óner mektebimen qatar, ómir mektebinen bilgen, túıgenderimen, alǵan sabaqtarymen, hobbılerimen, akter eńbegimen, óner jolyndaǵy qyzyqty oqıǵalarymen, jetistik, ataq, abyroıǵa jetýdiń, jastyqty saqtaýdyń qyr-syrymen bólisip, ǵıbratty da ónegeli ǵumyrynan jastarǵa estelikter aıtyp berdi.
О́zi de О́ner akademııasynda shákirt tárbıelep júrgen tulǵa ustazdardyń rólin, Qyzdar ýnıversıtetiniń búgingi qoǵamda alatyn rólin tilge tıek etip, qarakóz qaryndastaryna «Qazaq qyzy qandaı bolýy kerek?» degen suraqqa ósıet-ónegesin aıtty. Kózi tirisinde ańyzǵa aınalǵan tulǵa stýdentter tarapynan qoıylǵan tolassyz suraqtarǵa jalyqpastan, tushymdy jaýap berdi. О́z kezeginde kezdesýge dán rıza bolǵan aqynjandy arý qyzdar mazmundy kezdesýden týǵan arnaý óleńderin oqyp berdi.
– Men úshin búgin tarıhı kún. Kúndeligime enetin kún. Búgingi kezdesý maǵan shabyt berdi, qanattandyrdy. Qarap otyrsam, Qyzdar ýnıversıtetine osydan 45 jyl buryn kelippin. Qarakóz qyzdaryma tek baqyt tileımin! Qazaq qyzdary qashanda ınabatty, tártipti, ıbaly bolsa deımin. О́ıtkeni, eldiń, ultymyzdyń namysy bizdiń qyzdarymyz, qyzdaryna qarap, elin tanıdy. Qazaq qyzy qashanda arly, namysty bolýy kerek», degen A.Áshimov kezdesý sońynda sońǵy shyqqan 7 tomdyq tańdaýly kitabyn Qyzdar ýnıversıtetine syıǵa tartty.
Shara barysynda oqý ornynyń basshysy Dınar Nóketaeva jarty ǵasyrdan astam ýaqyt boıy ónerimen qalyń jurtyna qaltqysyz qyzmet etip kele jatqan kórnekti akter, rejısser, óner jáne qoǵam qaıratkeri Asanáli Áshimovtiń ıyǵyna qazaqy salt-dástúrmen shapan japty. Mártebeli qonaqpen kelgen qosaǵy Baǵdatqa da qoshemet kórsetildi. Qazaq sahna óneriniń maıtalmany Asanáli Áshimov, sonymen qatar, oqý ornynyń eń úlken marapaty – «Ulaǵat» altyn medalimen marapattaldy.
Taǵylymdy kesh «Jan saraıy» drama teatrynyń «Qyz Jibek» qoıylymymen aıaqtaldy.
Aınash ESALI,
«Egemen Qazaqstan».
ALMATY.